NASA DALAWAMPU’T ISANG PORSIYENTO PA LAMANG ANG COVID-19 BOOSTER ACCOMPLISHMENT NG DOH

Aabot lamang sa 21% ang “COVID-19 booster dose accomplishment” sa bansa.

Ito ang iniulat ng Department of Health o DOH, sa briefing ng House Committee on Health ngayong Miyerkules.

Ayon kay Dr. Alethea De Guzman ng DOH, nakamit na ng Pilipinas ang higit 90% ng COVID-19 vaccinated adult population.

Gayunman, talagang mababa pa ang bilang ng mga natuturukan ng booster dose.

Kabilang sa mga rason kung bakit hindi nagpapa-booster ang karamihan sa mga Pilipino ay: 

- Una, 9 mula sa 10 Pinoy ay “overconfident” sa proteksyon ng primary series, o kuntento na sa pagsunod sa preventive measures at iba pa

- Pangalawa, nakaranas sila ng “side effects” sa unang turok ng primary series

- Ikatlo, takot o may pangamba sa “cost” o gastos kapag nagkaroon ng side effects ang booster dose

- At pang-apat, pakiramdam ng mga tao ay hindi na kailangan ang booster shots dahil hindi requirement sa trabaho o paaralan

Sa tala ng DOH, higit 72 million na ang mga Pilipino na fully vaccinated na kontra COVID-19, o 92.31% ng target population.

Pero pagdating sa mga indibidwal na naturukan ng booster dose, halos 17 million pa lamang ang mayroon, o katumbas ng 21.76% ng target population.