Ikinatuwa ni Cavite Second District Representative Lani Mercado-Revilla ang bagong inisyatibo ng Department of Transportation (DOTr) na magbigay ng fare discounts para sa mga estudyanteng sumasakay sa Metro Rail Transit (MRT)—isang hakbang na napapanahon para suportahan ang mas malawak na access sa edukasyon.
Sinabi ni Congresswoman Mercado-Revilla na welcome development ito lalo na para sa mga estudyanteng araw-araw na umaasa sa pampublikong transportasyon para makapasok sa eskwela.
Dagdag pa niya, alam ng lahat na malaki ang gastos sa pag-aaral, kaya anumang tulong na makakagaan sa kanilang gastusin ay malaking bagay na para sa mga mag-aaral at kanilang pamilya.
Kamakailan lamang, inilunsad ng DOTr ang pinalawak na discount program para sa mga estudyante na sasakay sa MRT, kung saan itinaas sa 50% ang student fare discount sa LRT-1, LRT-2, at MRT-3 sa Metro Manila.
Para kay Cong. Lani, ang hakbang na ito ay tugma sa mas malawak na mga inisyatibo para tugunan ang mga isyu sa sektor ng edukasyon.
MULA SA KAMARA DE REPRESENTANTES, TERENCE MORDENO GRANA, NAG-BABALITA PARA SA ARMED FORCES RADIO, BOSES NG KAWAL PILIPINO
