BULTO NG IMPOTED NA ASUKAL NA HINDI PA DUMATING SA BANSA, KINOMPIRMA SA PAGDINING SA KAMARA

Kinumpirma ni Sugar Regulatory Board (SRA) Administrator Engr. Hermenegildo Serafica na hindi pa dumating sa bansa ang bulto ng asukal na inimport ng bansa sa ilalim ng Sugar Order no.3 kung saan nasa 200,000 metric tons na asukal ang inaangkat.

Sa isinagawang Joint briefing ng House Committee on Good Governance and Public Accountability at Agriculture and Food kahapon, kinumpirma ni Serafica na mayruong development na sa 200,000 metric tons na asukal na-inimport.

Inihayag ni Serafica sa Komite na as of August 12,2022, nasa kabuuang 185,633.9 metric tons ang nabigyan ng clearances ng Sugar Regulatory Administration (SRA).

Pero ayon kay Serafica sa ngayon ang dumating lamang at naideliver sa bansa  ay nasa 166,234.90 metric tons.

Nagkaroon din kasi ng aberya hinggil sa pag-angkat ng asukal sa ilalim ng SO no.3  dahil ipinatigil ito ng korte sa Negros Occidental.

Ang SO no.3 ay inilabas nuong buwan ng Pebrero.

Sa kabilang dako, naniniwala naman si Philippine Sugar Miller Association President Pablo Lobregat na kung natuloy lamang ang Sugar Order no. 3, hindi aniya magtataasan ang presyo ng asukal sa merkado.

MALAWAKANG CARTEL, HOARDING AT PROFITEERING, DAPAT IDEKLARANG ECONOMI SABOTAGE — SALCEDA

Iginiit ni House Committee on Ways and Means chairman Joey Salceda na dapat nang maideklarang “economic sabotage” ang large-scale o malawakang cartel, hoarding at profiteering.

Pormal nang inihain ni Salceda ang House Bill 3596, kung saan kanyang pina-aamyendahan ang Anti-Agricultural Smuggling Act, sa pamamagitan ng pagdaragdag ng mga parusa na tinukoy sa ilalim ng Section 5 ng “Price Act.”

Ayon sa mambabatas, layon ng kanyang panukala na mas tumalim ang ngipin ng batas, at mapatawan ng mas mabigat na parusa ang mga lalabag gaya ng habambuhay na pagkakakulong at malaking multa.

Gusto rin umano niyang magkaroon ng legal na basehan ang pamahalaan para ma-raid ang mga warehouse o masalakay ang mga hoarder at nasa likod ng cartel, gaya sa sektor ng asukal.

Higit sa lahat, pakay ng panukala na maprotektahan ang mga magsasaka at mga consumer laban sa mga pang-aabuso.

Sa House Bill, pinadedeklara ni Salceda na economic sabotage ang cartel, pag-iimbak at profiteering ng iba’t ibang produktong-agrikultural gaya ng asukal, mais, baboy at manok, isda, bawang, sibuyas at mga gulay, na mayroong minimum na halagang P1 million; habang kapag sa bigas ay minimum na P10 million.

Ang hoarding ay ang hindi nararapat na akumulasyon o pag-iimbak ng anumang pangunahing kalakal na lampas sa normal na imbentaryo; at hindi makatwirang limitasyon o pagtanggi na itapon, ibenta, o ipamahagi ang mga stock ng anumang produkto.

Ang profiteering naman ay ang pagbebenta ng anumang produkto sa mga presyong labis-labis sa tunay na halaga nito.

Samantala, ang cartel ay ang kasunduan o sabwatan ng mga partido na nakikibahagi sa produksyon, pamamahagi, pagbebenta, at pag-iimbak ng mga kalakal upang artipisyal at hindi makatwirang makapagtaas ng mga presyo.

COMPENSATION BOARD PARA SA PAGBAYAD NG DANYOS SA MGA MARAWI SIEGE VICTIMS, IMINUNGKAHI

Nanawagan si Lanao del Sur Rep. Zia Alonto Adiong kay Pangulong Ferdinand Marcos Jr., na kagyat nang buoin ang Marawi compensation board upang gumulong na pagbabayad ng danyos sa naapektuhan indibidwal at negosyo ng 2017 Marawi siege.

Sa kanyang privilege speech ipinunto ni Adiong na bagamat umabot na sa 80% angnatapos sa rehabilitation program para sa Marawi city, iniulat ng Task Force Bangon Marawi o TFBM na nasa 85,335 na indibidwal o mahigit 17,500 na household pa ang internally displaced…kabilang na mismo ang kinatawan.

Ayon sa kongresista, ang rehabilitasyon ng lungsod ay hindi lamang nakabatay sa naisaayos na imprastraktura ngunit lalo’t higit sa pagbangon ng mga residente.

At maisasakatuparan lamang aniya ito kung mabubuo na nag Marawi compensation board na siyang mangunguna sa pagbibigay reparation o bayad danyos sa mga nasirang bahay, negosyo at ari-arian.

Tinatayang aabot sa P17 billion ang halaga ng nasirang ari-arian at nawalang economic opportunities bunsod ng limang buwang giyera sa lungsod.

Abril ngayong taon ng magin ganap na batas ang Marawi Compensation Law.

"To establish the board is to commit strongly in supporting us — the people of Marawi City and Lanao del Sur —regain control of our circumstances. On this note, we respectfully appeal to the president to consider the immediate constitution of the Marawi Compensation Board," ani Adiong.

##

TULONG NG DEPED PARA SA MGA PRIBADONG LEARNING INSTITUTIONS, IPINANAWAGAN NG MAMBABATAS

Nanawagan ngayong Martes si Rep. Irene Gay Saulog (Party-List, KALINGA) sa Kagawaran ng Edukasyon (DepEd), na tulungan ang pribadong sektor upang sila rin ay makatulong na matugunan ang pagsisikip ng mga mag-aaral sa mga pampublikong paaralan para sa school year 2022-2023. 

“It will not only solve the problem of congestion in the public schools but will also put our private schools in a better position to succeed. Their survival is not a purely private interest. They contribute to the success of the whole education system,” ito ang tinuran ni Saulog sa kanyang privilege speech. 

Ipinaalala niya na ang partnership sa mga pribadong learning institutions sa pamamagitan ng voucher program para sa K to 12 ay napatunayang kapaki-pakinabang. 

“It has become a good model of public-private partnership in education where private institutional resources are used to provide wider education service in exchange of financial assistance from the government,” aniya. 

Ayon pa sa kanya, na kung itinuturing ng DepEd ang pansamantalang “learning spaces” tulad ng mga covered courts sa mga komunidad bilang tugon sa kakulangan ng mga silid-aralan, ay maaari siguro nilang ikonsidera ang mga hindi nagagamit na pasilidad ng mga pribadong paaralan na mas lubhang kaaya-aya sa pag-aaral. 

“We have a situation where public schools have an over spilling enrolment while private schools have facilities but lack learners. Therefore, an inclusive approach is necessary and will be beneficial to both public and private schools. After all, the two serve one nation, the quality of education in one affects the quality of Filipino citizens as a whole,” aniya. 

Binanggit ni Saulog ang isang matandang kasabihan ng mga Africano na, “It takes a village, in this case a nation, to educate our vast young Filipino learners. 

We should be one on this." Sa oras ng interpelasyon, nagpahayag si Rep. Raoul Danniel Manuel (Party-list, Kabataan) ng suporta sa panawagan ni Saulog sa DepEd, na ipaabot ang tulong para sa mga pribadong paaralan. 

ESPESYAL NA KOMITE SA FLAGSHIP PROGRAMS AND PROJECTS, GANAP NANG STANDING COMMITTEE

Inaprubahan ngayong Martes ng Kapulungan ng mga Kinatawan sa ilalim ng pamumuno ni Speaker Ferdinand Martin Romualdez, ang pagpapalit ng Espesyal na Komite sa Flagship Programs and Projects, bilang isang ganap na standing committee. Kamakailan ay hinirang si Rep. Claude Bautista (Lone District, Davao Occidental) upang pamunuan ang Komite. 

Kinabibilangan ng 20 miyembro, tutugunan nito ang “all matters directly and principally relating to the monitoring, evaluation, and review of highly strategic infrastructure programs and projects identified and approved by the National Economic and Development Authority (NEDA) Board Committee on Infrastructure and/or the Investment Coordination Committee and included in the General Appropriations Act, including the proposal of possible game-changing and high-impact flagship programs and projects, and the necessity of recommending requisite courses of action in relation thereto.” 

Sa pamamagitan ng pagpapalit, tatalakayin na ng lupon ang mga panukala na nangangailangan ng tuloy na tuloy pag-aaral sa lehislasyon, atensyon, at hakbangin. Pinangunahan ni Deputy Speaker Raymond Democrito Mendoza ang hybrid na sesyon sa plenaryo ngayong araw.

PAGPASA NG 2023 BADYET SA KAPULUNGAN SA TAKDANG PANAHON, TIWALA ANG LIDERATO

Tiwala ang liderato ng Kapulungan ng mga Kinatawan sa panahon na kanilang itinakda para sa kanila, upang aprubahan at ipasa ang panukalang pambansang badyet para sa 2023.

Umaasa sina House Majority Leader Manuel Jose "Mannix" Dalipe, Marikina City 2nd District Rep. Stella Luz Quimbo, at Pwersa ng Bayaning Atleta Party-list Rep. Margarita Ignacia "Migs" Nograles na magiging maayos ang pagbalangkas ng pambansang badyet o General Appropriations Bill (GAB) sa kapulungan, na siyang may kapangyarihan sa pondo, o ‘power of the purse.’ 

Ang National Expenditure Program (NEP), na siyang batayan ng GAB, ay isusumite sa Kapulungan sa Lunes, ika-22 ng Agosto. Sa ika-30 ng Setyembre, ang Kapulungan ay magre-recess sa unang pagkakataon ng ika-19 na Kongreso, at hindi ito magbabalik sesyon matapos ang isang buwan, sa ika-6 ng Nobyembre.

Nang matanong si Dalipe hinggil sa talaan ng badyet, inihayag niya sa pulong balitaan ng Ugnayan sa Batasan Majority News Forum, na: "Kaya, we were able to do it. Kailangan lang i-manage 'yung time, 'yung scheduling plus 'yung deliberations." 

"Last Congress nagawa natin 'yun, we were able to beat the September 30 deadline, giving all members of the House of Representatives time to deliberate, interpellate intelligently with all the departments. Dito nagsimula 'yung proseso, at gusto naming mabigyan lahat ng mga miyembro ng Kamara ng panahon na ma-scrutinize 'yung budget. And we were able to do that," ani Dalipe. 

"I can confidently say, we can make the September 30 deadline," pagdidiin ng Zamboanga City 2nd district congressman. 

Nagpahayag naman ng pananaw si Quimbo, senior vice chairman ng House Committee on Appropriations, kung papaano tatalakayin ng Kapulungan ang NEP. 

"August 22 is when we expect the NEP to be submitted to us by the executive and basically...this is merely a ceremonial turnover. After that, we will now have the budget briefings. So ito na 'yung sequential budget briefings with every agency and this will start on August 26 with a briefing by the DBCC (Development and Budget Coordination Committee)," aniya. 

Ayon sa kanya, plano ng Komite na tapusin ang pagtalakay at pagdinig sa badyet ng bawat ahensya  sa ika-16 ng Setyembre. Nangangahulugan ito na may dalawang lingo ang plenaryo ng Kapulungan na maaprubahan sa ikatlo at huling pagbasa ang GAB bago ang itinakdang recess. 

Pinatunayan ni Quimbo ang kakayahan ni Dalipe na isulong ang pagpasa sa GAB sa takdang panahon. 

"As you may know, si Majority Floor Leader Dalipe was a former vice chair of the appropriation committee at ako ay buhay na saksi sa hard work at dedication ni Majo Dalipe sa lahat ng budget deliberations," ani Quimbo.

"Simple lang naman yan, talagang makukuha talaga sa hard work ng mga members," giit pa ng mambabatas mula sa Marikina. 

Para naman kay Nograles, sinabi niya na ang lupon ng apropriyasyon ay magdaraos ng pagdinig ngayong linggo upang ihanda sa pagsusumite ng NEP. 

"We already have a meeting this week for the Committee on Appropriations to be able to really buckle down and talk about the budget that we will be handling. We aim to finish that before [the start of the recess] on September 30," ani Nograles. #

PANUKALA PARA SA MGA KARAPATAN NG IDPs AT PAGLIKHA NG MARAWI COMPENSATION BOARD, ISINUSULONG NG MAMBABATAS

Sa kanyang privilege speech ngayong Lunes, tinalakay ni Rep. Ziaur-Rahman Alonto Adiong (1st District, Lanao del Sur) ang kahalagahan ng pagtitiyak sa mga karapatan ng mga Internally Displaced Persons (IDPs) sa bansa, na pangangalagaan at poprotektahan sa lahat ng paraan. 

Sinabi ni Adiong na ipinakikita sa mga datos ng Task Force Bangon Marawi (TFBM) na may 85,335 katao pa ang nananatiling internally displaced, limang taon matapos ang Marawi City siege, na nasasakupan ng kanyang legislative district. 

Nanawagan siya sa Kapulungan ng mga Kinatawan na iprayoridad ang pagsasabatas nito sa ika-19 na Kongreso. Nanawagan din si Adiong kay Pangulong Ferdinand "Bongbong" Marcos Jr. na madaliang itatag ang Marawi Compensation Board alinsunod sa nakasaad sa Republic Act 11696 o ang "Marawi Siege Compensation Act." "The establishment of the Marawi Compensation Board is necesssary to the success of our joint rehabilitation and recovery efforts. 

To establish the board is to commit strongly in supporting us - the people of Marawi City and Lanao del Sur - regain control of our circumstances," aniya. 

Umapela rin siya kay Pangulong Marcos Jr. na ikonsidera ang 'buhay na realidad' ng mga mamamayan ng Maranao, habang ipinagpapatuloy ng ehekutibo ang reclassification at redistribution ng mga lupain sa Lungsod ng Marawi. 

Hinihikayat rin niya ang iba pang mga mambabatas na tiyakin ang wastong apropriyasyon upang epektibo at episyenteng maipatupad ang nasabing batas. 

Sina Reps. Bienvenido Abante Jr. (6th District, Manila) at Gerville Luistro (2nd District, Batangas) ang nag-interpelasyon kay Adiong sa kanyang sponsorship speech.

WALANG PAHINTULOT NA PAG-ANGKAT NG 300K METRIKO TONELADA NG ASUKAL NA NAKAPALOOB SA SRA ORDER, TINALAKAY NG MAGKASANIB NA KOMITE

Tinalakay ngayong Lunes ng magkasanib na pagpupulong ng mga Komite ng Good Government and Public Accountability na pinamumunuan ni San Jose Del Monte City Rep. Florida “Rida” Robes, at Agriculture and Food na pinamumunuan ni Quezon Rep. Wilfrido Mark Enverga sa Kapulungan ng mga Kinatawan, kasama ang mga kinauukulang ahensya ng pamahalaan, upang imbestigahan ang Sugar Order (SO) No. 4, na magpapahintulot sa pag-angkat ng 300,000 metriko tonelada ng asukal.  

Sinabi ni Enverga na tinutulan ng karamihan ng mga lokal na magtutubo ang SO 4.  Dagdag pa niya, ito ay "iligal" na nilagdaan ng mga kasapi ng lupon ng Sugar Regulatory Administration (SRA), kabilang si dating Agriculture Undersecretary Leocadio Sebastion. 

Sa kanyang bahagi, ipinaliwanag ni Robes na ang tanging awtorisado ng SRA ay si Pangulong Marcos bilang tumatayong Kalihim ng Agrikultura. 

Samantala, sinabi ni Sebastian na agad siyang nagbitiw sa kanyang puwesto "nang hindi aprubahan ni Pangulong Ferdinand "Bongbong" Marcos Jr. ang kanyang aksyon."  

Dagdag pa niya, nilagdaan niya ang SO 4 batay sa datos na ibinigay sa kanya na may napipintong kakulangan sa suplay ng asukal ngayong taon.  

Sa kawalan ng isang resolusyon sa Kapulungan, nagkaisang inaprubahan ng mga kasapi ng Komite ang isang mosyon na pormal na magsagawa ng imbestigasyon motu proprio, na magbibigay-daan upang mas masusing masiyasat ang usapin. 

Sa pamamagitan nito, magkakaroon ng pagkakataon ang mga mambabatas na makapagtanong, at oobligahin ang mga panauhin na makapagsalita nang nanumpa. 

Bago magtapos ang pagdinig, nanawagan sina Negros Occidental Rep. Juliet Marie de Leon Ferrer at ACT Teachers Rep. France Castro sa iba pang kasapi ng lupon ng SRA, na lumagda sa SO 4, na kusa nang magbitiw bago pa ang susunod na pagdinig sa ika-18 ng Agosto 2022.

UNANG PULONG NG KOMITE NG GOOD GOV’T AT PUBLIC ACCOUNTABILITY, IDINAOS

Sa unang pagkakataon ngayong Ika-19 na Kongreso, nagpulong ngayong Lunes ang Komite ng Good Government at Public Accountability ng Kapulungan ng mga Kinatawan, na pinamumunuan ni San Jose Del Monte City Rep. Florida “Rida” Robes, para sa kanilang organizational meeting. 

Sa kanyang pambungad na pananalita, binanggit ni Robes na saklaw ng hurisdiksyon ng Komite ang “all matters directly and principally relating to malfeasance, misfeasance, and nonfeasance in office committed by officers and employees of the government and its political subdivisions and instrumentalities inclusive of investigations of any matter of public interest on its own initiative or upon order of the House.” 

Samantala, ang mga miyembro ng Komite ngayon ay mabilis na inaprubahan ang Rules of Procedures na namamahala sa mga paglilitis ng Komite. 

Tiniyak ni Robes na susundin ng Komite ang mga tuntuning ito sa paglilingkod, sa interes ng mamamayang Pilipino.

PAGTATATAG NG MGA OFW FAMILY CENTERS NA TUTULONG SA MGA NAIWANG PAMILYA NG MGA OFWS, ISINUSULONG NG MAMBABATAS

Sinabi ngayong Lunes ni Rep. Marissa Magsino (Party-list, OFW) sa sesyon sa plenaryo, na isusulong niya ang isang panukala na magtataguyod sa kapakanan at proteksyon sa mga karapatan ng mga overseas Filipino workers (OFWs), lalo na ang pagtatatag ng mga OFW family centers. 

Sa kanyang privilege speech, sinabi ni Magsino na magbabahagi rin ng mga serbisyong welfare assistance at counseling ang mga OFW family centers sa mga naiwang pamilya ng mga OFWs, kabilang na ang pagsasagawa ng mga programa sa scholarship para sa kanilang mga anak. 

Kanyang sinabi na ang pangingibang bansa ng mga Pilipino, upang humanap ng mas mainam na pagkakakitaan ay kadalasang may kaakibat na sakripisyo at kabayaran. 

“We are all too aware that our overseas workers often fall prey to illegal recruitment, such as contract-switching, non-provision of mandated benefits, high placement fees, and costs of other regulatory requirements,” pahayag niya. 

Bukod pa rito, nakakaranas rin sila ng hindi makatarungang pagdurusa sa pisikal, damdamin, at sikolohical na pagmamaltrato o mga maling kasong kriminal at labag sa batas na pagkakabilanggo. 

Tinalakay rin ni Magsino ang mga pamilyang naiwan na siyang dumaranas ng kahirapan, at mga pagsubok dulot ng pisikal na pagkakawalay. 

“But more disturbing is the fact that children are also at the receiving end of the social costs, and often are worst hit,” panlulumo pa niya. 

Binanggit ni Magsino ang halagang panlipunan ng pangingibang bansa dahil sa trabaho, na ang isa rito ay ang pagkakawatak-watak ng pamilya. 

Nanawagan si Magsino sa pamahalaan na maging mas maagap sa kanilang mga polisiya, at mga programa sa pangangalaga hindi lamang ng mga OFWs, kungdi maging ang kanilang mga pamilyang naiiwan. 

Sa interpilasyon ni Rep. Richard Gomez (4th District, Leyte) matapos ang privilege speech ni Magsino, tinanong siya kung anong pamamaraan ang kanyang iminumungkahi na maaaring itugon ng Kapulungan sa mga kasong umuuwi ang mga OFWs na walang naimpok sa kanilang pagtatrabaho. 

Sinagot ni Magsino na dapat gabayan ang mga OFWs kung papaano nila matitipid ang kanilang mga kita sa pamamagitan ng financial literacy, upang matuto sila na makapag-impok para sa kanilang mga pangangailangan sa hinaharap.

MGA KASAPI SA LUPON NG HREP SA COMMISSION ON APPOINTMENTS, PINULONG UKOL SA MGA PAMAMARAAN NITO

Binigyan ng pangkalahatang-ideya o mga highlight ng mga pamamaraan sa proseso ng pagkumpirma ng CA ngayong Lunes, ang mga kasapi ng Kapulungan ng mga Kinatawan sa Lupon ng Commission on Appointments (CA), na pinamumunuan ni Pangasinan Rep. Ramon Guico Jr. 

Ipinaliwanag ni CA Deputy Secretary for Legal Affairs Atty. Alvin Cruz sa mga mambabatas ang mga pamamaraan sa paghirang.  

Sinabi ni CA Technical Support Service Director Atty. Dennis Perang na mayroon silang 197 appointment sa kasalukuyan, 166 dito ay nagmula sa pambansang depensa. 

Kasunod ng isang pribadong sesyon, binigyan ang mga hepe ng mga kasapi na mambabatas ng Kapulungan ng mga Kinatawan, sa Lupon ng CA ng hiwalay na pagpupulong hinggil sa usapin.  

Dumalo sa pagpupulong ang mga kasapi ng CA na sina Camarines Sur Rep. Luis Raymund Villafuerte Jr., Cavite Rep. Lani Mercado-Revilla, Surigao del Sur Rep. Johnny Ty Pimentel, Iloilo Rep. Ferjenel Biron, Bacolod City Rep. Greg Gasataya, Bataan Rep. Albert Garcia, GP PARTY Rep. Jose Gay Padiernos, Camiguin Rep. Jurdin Jesus Romualdo, SAGIP Rep. Rodante Marcoleta at Caloocan City Rep. Oscar Malapitan.

PANUKALANG TRAFFIC CENTER PARA GAWING SENTRALISADO ANG TRAFFIC ENFORCEMENT, KASAMA ANG PAG-APRUBA SA “NO CONTACT APPREHENSION POLICY”

Upang makapamahagi ng balangkas para sa nag-iisa at sentralisadong diskarte sa pagpapatupad ng batas trapiko, iminungkahi ni Rep. Ramon Rodrigo “Rodge” Gutierrez (Party-list, 1 RIDER) ang paglikha ang National Traffic Enforcement and Management Center o “Traffic Center,” bilang pangunahing ahensya na siyang mangangasiwa sa trapiko, kabilang na ang pagbalangkas at pag-apruba ng “No Contact Apprehension Policy.” 

Sa House Bill 3410, o ang panukalang "Traffic Enforcement Centralization Act", isinusulong ni Gutierrez ang paglikha ng National Traffic Enforcement and Management Center o “Traffic Center.” 

“The problem of traffic in this representation’s opinion warrants a body dedicated to traffic, and not merely an adjunct of the other bodies. National in scope, it is to supersede other jurisdictional traffic bodies, such as the Metro Manila Development Authority (MMDA) and the Local Government Unit enforcement arms, as well as unify their enforcement powers under one body. Under such proposed structure, traffic offense would be considered universal in scope and application,” ani Gutierrez. 

Kanyang sinabi na ang Traffic Center ihihiwalay sa ibang mga ahensya, tulad ng Land Transportation Office (LTO) at Land Transportation Franchising and Regulatory Board (LTFRB), dahil ito ay magiging pangunahing ahensya na mangangasiwa sa mga polisiya ng trapiko, regulasyon at pagpapatupad nito, hindi katulad ng LTO at LTFRB na ang tungkulin ay sa mga usapin lamang ng rehistrasyon. Isa sa mga mahahalagang tampok ng panukala ay ang Section 15, na naglalatag ng mga prinsipyo ng “No Contact Apprehension Policy.” 

Sinabi ni Gutierrez na ang polisiya ay ipapatupad sa pamamagitan ng mga karapatan sa due process at pantay na proteksyon ng mga batas, kabilang ang pagtalima sa mga sumusunod na regulasyon: 1) pagkakaroon ng dry run sa loob ng isang taon na ipapatupad sa isang covered area sa ilalim ng pangangasiwa ng Traffic Center; 2) lahat ng mga karatula at signages ng covered area ay dapat na malinaw at naiintindihan; 3) kagyat na notipikasyon ng umano’y paglabag ng isang motorista sa loob ng 24 na oras matapos ang insidente; 4) ang mabilis na akses ay nangangahulugan nang wastong kontak ng motorista at detalye ng rehistrasyon; 5) sa pinagtatalunang paghuli, ang adjudication ay pamamahalaan ng Traffic Center Adjudication Board; at 6) ang iba pang patakaran o mga kondisyon na maaaring itakda ng Traffic Center upang maprotektahan ang mga karapatan ng motorista. 

Ang “No Contact Apprehension Policy” ay ipapatupad lamang sa ilang jurisdiction, kapag nakasunod sa mga kondisyong itinakda ng Traffic Center. 

Ang hindi pagsunod sa anumang kondisyon na itinakda ng Traffic Center ay ipagbabawal ang paggamit ng “No Contact Apprehension Policy”, at ang manual na paghuli ng mga traffic enforcers ang ipaiiral. Ang Traffic Center ay magiging attached na ahensya sa Department of Transportation for policy and program coordination. 

Upang epektibong maipatupad ang kanilang tungkulin, mag-iisyu ang Traffic Center ng sentralisadong listahan ng mga batas trapiko at mga paglabag, kabilang na ang pagsasanay sa lahat ng traffic officers at mga tauhan ng traffic enforcement, management, at ang pagsasagawa ng maayos na imbestigasyon sa mga aksidente.

PAGPAPAUNLAD NG MGA CAPITAL MARKETS SA SOCIALIZED HOUSING, ISINUSULONG NG MAMBABATAS

Inihain ni 1-PACMAN Party-list Rep. Michael Romero ang House Bill 891, na naglalayong paunlarin ang capital market sa pamamagitan ng pamamahagi ng ligal at balangkas na regulasyon, sa pagsasailalim sa seguridad at paglikha ng naaayong kapaligiran ng merkado, para sa mga hanay ng mga seguridad na suportado ng mga pag-aari. 

Layon ng panukala na amyendahan ang Section 48 ng Republic Act 9267, o ang Securitization Act of 2004, Providing For Stiffer Penalties and Sanctions, And For Other Purposes. 

“It is imperative that the State justifies the rules, regulations and laws that impact upon the securitization process, particularly on matters of taxation and sale of real estate on installment,” ani Romero sa kanyang paliwanag na nakasaad sa panukala. 

Isinasaad din sa panukala na ipagpapatuloy ng estado ang pagpapaunlad ng secondary market, lalo na ang para sa residential mortgage-backed securities, at iba pang financial instruments na may kaugnayan sa pabahay, “as essential to its goal of generating investment and accelerating the growth of the housing finance sector, especially for socialized and low-income housing.” 

Bukod rito, isinasaad din sa panukala na, sinoman ang mapapatunayang lumabag sa mga probisyon ng HB 891, ay pagmumultahin ng halagang mula P500,000 hanggang P5,000,000, o pagkabilanggo ng anim hanggang dalawampu’t isang taon, o pareho alinsunod sa utos ng hukuman. 

Kapag ang lumabag ay isang korporasyon, partnership o asosasyon, o iba pang juridical entity, ang parusa ay alinsunod sa itatakda ng hukuman sa mga opisyal ng naturang korporasyon na siyang responsable sa nasabing paglabag, at kapag ang opisyal ay isang dayuhan, bukod sa itinakdang multa, siya ay ipatatapon ng walang anumang proseso, matapos niyang pagsilbihan ang itinakdang parusa.

“NO CELLPHONE DURING CLASSES BILL,” ITINUTULAK SA KAMARA

Nais ni House Committee on Ways and Means Chairman Joey Salceda na maipagbawal na ang paggamit ng “cellular phones” at katulad na digital devices sa panahon ng klase ng mga estudyante.

Sa House Bill 662 o “No Cellphone during Classes Bill” --- itinutulak ni Salceda na masakop nito ang lahat ng pribado at pampublikong kindergarten, elementary, secondary at tertiary education institutions.

Sa ilalim ng panukala, ipagbabawal ang access at paggamit ng cellphones at smart devices habang may klase, maliban na lamang kapag may emergencies at may teaching programs kung saan kinakailangang gumamit ng cellphones at kaparehong gamit.

Oobligahin naman ang mga paaralan na magkaroon ng “device depository office” kung saan ilalagak ng mga estudyante ang kani-kanilang cellphones at gadgets, pagpasok nila ng school premises.

Inamin ni Salceda na ang paggamit ng cellphones at iba pang digital devices ay maraming benepisyo gaya sa mga negosyo, trabaho at paaralan, gayundin sa komunikasyon ng mga magkakaibigan o magkakaanak, at iba pang mga posibleng gamit.

Ngunit ang paggamit aniya ng cellphones ay “Janus-faced” o doble-kara, dahil sa kabila ng maraming advantages, ang mga ito ay nakaka-distract o nakakaabala at nakakagulo sa trabaho at school activities lalo na sa hanay ng mga kabataan. (Isa)

REP. RECTO: BARANGAY AT SK ELECTIONS SA DISYEMBRE 2022, DAPAT IPAGPALIBAN PARA MAILAAN ANG PONDO PARA DITO SA MGA PROGRAMA NG DA

Itinutulak ni House Deputy Speaker Ralph Recto na maipagpaliban ang Dec. 2022 Barangay at Sangguniang Kabataan o SK Elections, at mailaan ang pondo nito sa mga programa ng Department of Agriculture o DA upang matiyak ang “food security and sufficiency” para sa 109 milyong Pilipino.

Sa kanyang House Bill 2185 --- isinusulong ni Recto na idaos na lamang ang halalang pambarangay at SK sa ikalawang Lunes ng Mayo 2024.

Paliwanag ni Recto, ang nagbabadyang global food crisis na dala ng COVID-19 pandemic, isyu sa supply chain, energy crisis, maging ang tensyon ng Russia at Ukraine, mataas na presyo ng mga bilihin at inflation, ay tiyak na makakaapekto at banta sa seguridad ng pagkain sa Pilipinas.

Kaya naman ilalim ng panukala ni Recto, ang “savings” o hindi pa nagagamit na budget mula sa P8.4 billion na alokasyon para sa Barangay at SK polls ay ipinalalagay sa mga programa ng DA at palakasin ang “Plant, Plant, Plant Program” o “Ahon Lahat, Pagkaing Sapat o ALPAS laban sa COVID-19."

Magbebenepisyo aniya sa mga naturang programa ang mga magsasaka, mangingisda at pati ang mga consumer.

Naririto ang subsidiya para sa mga buto at abono; credit at logistical support; modernong farming technology; at farm-to-market roads, irigasyon o patubig, at post-harvest facilities.

Ayon kay Recto, ang budget kasi na inilaan para sa mga nabanggit na programa ng DA ay hindi sasapat, kaya ang higit P8 billion na budget ng Barangay at SK Elections ay tiyak aniyang makakatulong para mapondohan ang priority programs ng DA. (Isa)

PAGLALAGAY NG MGA COVID-19 VACCINE CENTER SA MGA PAARALAN, IPINANAWAGAN

Iginiit ni CamSur Rep. LRay Villafuerte sa mga local government units na makipag-ugnayan sa Department of Education at Department of Health gayundin sa Department Interior and Local Government.

Para ito sa paglalagay ng anti-Covid 19 vaccine centers sa mga paaralan bilang suporta sa pagsisikap ng Marcos Administration na mapag-ibayo ang pagbabakuna sa harap ng nakatakdang pabubukas ng klase sa susunod ba linggo.

Ayon kay Villafuerte ang paglalagay ng vaccination centers sa mga eskwelahan ay makakatulong para mas marami ang mabakunahang mga guro at mag-aaral para sila ay maproteksyunan sa muling pagbabalik ng face to face classes habang tumataas muli ang kaso ng COVID 19 sa bansa.

tinukoy ni Villafuerte na sa ngayon ay maaring tumanggap ng booster shots ang mga adults at mga batang edad 12 hangang 17 habang maari ng bigyan ng 2 doses ng bakuna ang 5 hanggang 11 taong gulang.

Nakikiisa din si Villafuerte sa apela ni DepEd spokesman Michael Poa sa mga opisyal ng LGU na alisin na ang mga itinayong Covid-19 isolation facilities sa mga paaralan.

inihalimbawa ni Villafuerte ang ginawa ng Camsur provincial capitol na pagtanggal sa Covid-19 quarantine centers sa mga eskwelahan at paglipat ng mga ito sa district hospitals o sa isolation facilities na inilaan ng provincial government. (Grace)

PAGPAPALAWIG NG NATIONWIDE LIBRENG SAKAY HANGGANG SA SUSUNOD NA TAON, IPINAKIUSAP NI REP. VILLAR KAY BBM

Ipinakiki-usap ni House Deputy Speaker Camille Villar sa administrasyong Marcos na palawigin ang Nationwide Libreng Sakay Program hanggang sa susunod na taon.

Sinabi ni Villar sa kanyang House Resolution 173 na habang ang bansa ay unti-unting bumabalik sa normal sa gitna ng COVID-19 pandemic at naghahanda rin sa papalapit na face-to-face classes, kailangang matiyak ng pamahalaan ang sapat na deployment ng iba’t ibang modes of transportation.

Ayon kay Villar, sa gitna ng inflation o mabilis na pagtaas ng presyo ng mga bilihin at mataas pa ring halaga ng produktong petrolyo, hindi umano mabuti na singilin pa ng pasahe ang mga pasahero.

Kaya sa pamamagitan aniya ng Libreng Sakay, lalo na kung maipatutupad ng maayos at magkakaroon ng sapat na mass transportation, tiyak umanong makikinabang dito ang maraming Pilipino lalo na ang mga mahihirap.

Matatandaan na ang Libreng Sakay ay inilunsad ng Duterte administration sa kasagsagan ng pandemya, kung kailan maraming pasahero ang apektado ng serye ng mga community quarantine.

Sa ilalim ng Libreng Sakay, higit 140 ang ruta ng mga public utility jeepneys o PUJs sa buong bansa, bukod pa sa may Libreng Sakay din sa MRT-3, LRT-2, PNR at EDSA Carousel Bus.

Ang pinalawig ng administrasyong Marcos ay ang Libreng Sakay sa EDSA Carousel Bus hanggang Dec. 2022, habang ang Libreng Sakay sa LRT-2 ay mula Aug. 22 hanggang Nov.5 pero limitado na lamang sa mga estudyante.

HINDI NAGAMIT NA MILYUN-MILYONG DOSES NG BAKUNA KONTRA COVID-19, PINASISIYASAT SA KAMARA

Pinasisiyasat ni House Minority Leader Marcelino Libanan sa Committee on Health ang umano’y hindi nagamit at na-expire na na milyun-milyong doses ng bakuna kontra COVID-19 sa gitna ng pandemya.

Sa House Resolution 191 ni Libanan, nais niyang paimbestigahan sa Kamara ang tinawag niyang nakaka-bahalang ulat ukol sa nasayang at napanis na mga bakuna.

Sinabi ni Libanan na target ng Department of Health o DOH na makapagturok ng COVID-19 booster shots sa 11 hanggang 23 milyong “fully vaccinated” na na mga indibidwal sa bansa sa unang 100 araw ng administrasyon ni Pangulong Ferdinand Marcos Jr.

Ayon sa kanya, may mga report na mula noong Abril hanggang Hulyo ngayong 2022, nasa 4 na milyon hanggang 27 milyong doses ng COVID-19 vaccines ang hindi nagamit at na-expire lamang na ang halaga ay aabot sa P5 billion hanggang P13 billion.

Bagama't sinasabing nasa “tolerable level” o katanggap-tanggap na antas ng “vaccine wastage” ang napaulat na expired na mga bakuna, ikinatwiran ni Libanan na ang bilyong-bilyong pisong halaga naman ng mga ito ay sadyang nakakahinayang.

Giit pa ng lider ng Minorya sa Kamara, kailangang umaksyon o magsumikap din ang pamahalaan upang mabawasan ang vaccine wastage, at maging transparent o tapat sa paglalabas ng ulat ukol sa mga napapasong bakuna upang matukoy ang dahilan at magpatupad ng epektibong “intervention” para rito.

Sa pinakahuling ulat ng DOH, mula sa higit 200 million doses ng bakuna na donasyon o kaya’y binili ng gobyerno, nasa 6.6% ang vaccine wastage na pasok pa rin sa standards ng international organizations gaya ng World Health Organization o WHO.

More Pix of Katropa sa Kamara

 04 December 2021

06 December2021 

04 December 2021

27 Nobember 2021

20 November 2021

09 Oct 2021 edition of KsK