Muslim solon nainsulto sa paggamit ni Magalong ng salitang ‘moro-moro’ sa pag-iimbestiga sa flood projects
Nainsulto ang isang kongresista mula sa Mindanao sa pahayag ni Baguio City Mayor Benjamin “Benjie” Magalong na tinawag na “moro-moro” ang imbestigasyon sa mga anti-flood projects.
Ayon kay House Deputy Majority Leader at Lanao del Sur Rep. Zia Alonto Adiong dapat igalang ang Kamara bilang institusyon na mayroong mandato na mag-imbestiga at mangalap ng ebidensya kaugnay ng mga alegasyon.
Ang pagbibitaw umano ng mga “sweeping labels” o patutsada ay nakasisira sa reputasyon ng lahat ng miyembro ng Kongreso kabilang ang mga gumaganap sa kanilang tungkulin ng buong katapatan.
“As a Muslim, I take offense at the casual use of the term ‘moro-moro’ to describe an investigation. Words carry history. We can debate corruption with vigor, but we should never trivialize the struggles of Moro communities by turning that term into an insult,” ani Adiong.
Nagpahayag ng pagdududa si Magalong sa pagsasagawa ng Kongreso ng imbestigasyon hinggil sa umano’y iregularidad sa flood control projects at isinulong ang isang third-party inquiry.
Inakusahan din ng alkalde ang mga mambabatas na umano’y nakatanggap ng malaking kickbacks mula sa mga kontratista.
Dahil dito, si Magalong ay inimbitahanng binuong House tri-panel upang mailahad under oath ang kanyang testimonya at mailabas ang kanyang mga ebidensya para mapatunayan ang alegasyon na kanyang inilabas sa media.
Bukod naman sa isyu ng proseso, binigyang-diin ni Adiong na ang paggamit ng katagang “moro-moro” ay may dala-dalang mabigay na nakaraan para sa mga Muslim dahil nag-ugat ito sa isang dula noong panahon ng Kastila na nagtutunggali ang “Christians” at “Moros” — isang uri ng pagtatanghal na nakaugnay sa kolonyal na stereotype at matagal nang diskriminasyon.
Dagdag pa niya na bagama’t ang termino ay karaniwan nang ginagamit para ilarawan ang isang huwad o pekeng palabas, marami pa ring Muslim ang itinuturing itong insensitibo sa pampublikong diskurso.
“Sana huwag naman ganun ang lengguwahe. In fact, sana wag naman ganun ang atake. Nakikiusap tayo kay Mayor Magalong, please lang po, be sensitive in your language,” ani Adiong.
Ipinaliwanag din niya na tumataas ang kumpiyansa ng publiko sa anumang imbestigasyon kung ang mga nag-aakusa ay naglalatag ng dokumento at handang hunarap sa mga pagtatanong, dahil may mekanismo ang Kongreso upang tumanggap ng ebidensya, tumawag ng mga saksi, at makipag-ugnayan sa mga ahensyang nagpapatupad ng batas.
“If you believe some House members are guilty, name them and present the proof. Do not condemn the entire House. Huwag naman po sana nating lahatin. Madami sa amin ang inosente at nagtratrabaho lamang para sa aming constituents,” giit pa ni Adiong.
“When the whole institution is attacked, the innocent are dragged with the guilty, and the public loses sight of the facts we all need,” dagdag niya.
Binibigyang-diin ng mambabatas na ang paggalang sa institusyon ay hindi nangangahulugang pagtatakip sa sinumang may sala. Sa halip, ito ay pagbibigay-daan sa mga kinatawang komite na gawin ang kanilang tungkulin at pagtitiyak na makakumpleto ng salaysay sa ilalim ng panunumpa, habang nakikipagtulungan sa ahensya ng ehekutibo kung may pananagutang kriminal.
“Hindi kailangang bastusin ang institusyon para umusad ang katotohanan. Trabaho ng Kongreso ang magtanong at mag-audit bilang bahagi ng oversight powers. Kung may kasalanan, papanagutin,” pahayag ni Adiong.
Hinikayat din ng lider ng Mindanao House si Magalong na ialatag ang mga dokumento, pangalanan ang dapat pangalanan, at tumulong na makamit ang mga hatol kung kinakailangan.
“We welcome testimony under oath, in an open forum, with complete documentary support. That is the most direct way to protect public funds, clean up the system and ensure that every peso truly prevents flooding rather than lining pockets,” sabi pa niya.
“But let us raise the standard of our public conversation. Kung may ebidensya, ilatag. Kung may salita, ingatan. We owe it to the people to pursue the truth with precision, and we owe it to our institutions to pursue it with respect,” pagtatapos ni Adiong. (END)
No comments:
Post a Comment