KARAGDAGANG PONDO PARA SA PNP AT IBA PANG ANTI-DRUG AGENCIES, ITINULAK NI REP. RICHARD GOMEZ

Itinutulak ni Leyte Rep. Richard Gomez na dagdagan ng Kongreso ang pondo ng PNP at iba pang anti-drug agencies para sa training sa paghawak ng mga ebidensya sa drug cases.

Ito’y matapos ibahagi ni PNP Deputy Chief of Operations PMGEN Benjamin Santos na nasa .88 percent o wala pang isang porsyento ang conviction rate nila sa mga kaso na may kaugnayan sa iligal na droga.

Malaking dahilan aniya nito ang pagkaka-dismiss ng kaso dahil sa technicality sa chain of custody o paghawak sa mga ebidensya.

Punto ni Gomez, kung magtutuloy-tuloy ang mababang conviction rate ay paglalaruan lang ng mga drug traffickers ang otoridad.

Bilang dating local chief executive batid ani Gomez ang hirap ng mga kapulisan para sa labanan ang iligal na droga ngunit nababalewala lamang dahil sa teknikalidad.

Ayon naman kay Santos, nitong nakaraang linggo ay isinailalim nila sa training kaugnay sa chain of custody ang nasa 16,000 investigators.

“We can see that the conviction rate is very low. A major part of that, major contributor of that is the technicality on the chain of custody. That’s why if by legislation Mr. Chair, maybe we can help the police force or all the anti-drug agencies to at least increase tehir budget for training para mas gumaling ang pag-handle nila ng mga evidence, pag-harap nila sa mga cases nila otherwise, kung magtutuloy-tuloy lang ‘to, kawawa rin naman yung mga trabaho ng pulis nababalewala. With a very low conviction rate of less than 1percent, paglalaruan lang tayo ng mga drug traffickers.” Saad ni Gomez.

DAGDAG SA 2023 BUDGET NG DFA, HINILING NG KAGAWARAN SA KAMARA

Umaabot sa 20.303  billion pesos ang  budget ng department of foreign affairs para sa fiscal year 2023.

Mas mababa ito ng 1.2 billion pesos kumpara sa 2022 budget na nasa 21.545 billion pesos.

Sa pagharap ng DFA sa house committee on appropriation, hiniling nito  dagdagan ang kanilang budget para sa susunod na taon upang mas palakasin ang kapasidad ng DFA.

Ayon sa DFA undersecretary Antonio Morales nasa 10.7 million na ang mga pinoy sa ibat ibang bahagi ng mundo kaya tumataas din ang demand ng mga ito na mapagsilbihan.

Sa katunayan anya.. marami na ang nagrerequest ng dagdag na consular office abroad para matugunan ang kanilang pangangailangan.

Panawagan ng DFA, ibalik ang ibinawas na budget para sa  tier  2 proposal ng ahensya.

Samantala, ipinagmalaki naman  ng DFA na kabilang sila sa top  revenue generating agency ng bansa kung saan umabot sa 3 billion pesos.

ILANG MGA PANUKALANG BATAS, INAPRUBAHAN NG COMMITTEE ON HIGHER EDUCATION NGAYONG ARAW

Inaprubahan ng house committee on higher  and technical education ang ilang panukalang batas. 

Ito ay ang House Bill 2625 o converting the Floridablanca National Agriculture School na maging attached campus ng Pampanga State Agricultural University. 

Umaasa si  senior deputy speaker Gloria Macapagal Arroyo  na may akda ng house bill na maisasabatas ang panukala upang masalba ang buhay ng eskwelahan na humaharap sa hamon ng pondo para mas lalong makapagsilbi sa mamayan duon. 

inaprubahan din ng komite ang house bill 3251 converting the San Isidro Satellite Campus of the Leyte Normal University  na maging  regular campus  na panukala ni  Tingog party-list Rep. Yedda Marie Romualdez. 

Lusot din sa committee level ang HB 1693, Mandating the integration of the National Building Code of the Philippines bilang major subject ng mga Engineering courses. 

Maging ang HB 1665 o Establishing an enterprise-based education and training program ay inaprubahan ng komite.

PANANAMBANG AT PAGPATAY SA HEPE NG PNP AT DRIVER NITO SA AMPATUAN, PINA-IIMBESTIGAHAN

Umapela si Basilan Representative Mujib Hataman sa Philippine  National Police  na imbestigahan at resolbahin sa lalong madaling panahon ang pinakahuling insidente ng karahasan sa bayan ng Ampatuan.

Kinundina ni Hataman ang pag-ambush sa hepe ng bayan ng Ampatuan na si Police Lt. Reynaldo Samson at driver/bodyguard nito na si Police Corporal Salipudin Endab at pagkasugat ng tatlong iba pa.

Isisilbi sana ng grupo ni Samson ang warrant of arrest sa isang nagngangalang Kamir Kambal na wanted sa kaso ng robbery nang tambangan ang mga ito.

Pinaniniwalaan na kagagawan ng grupo ni Abdulnasser saptula gulanid ang ambush kina Samson at mga kasamahan nito.

Giit ni Hataman, dapat imbestigahan din ng PNP ang anggulo na may breakdown ng peace and order sa lugar at bakit alam ang ruta at oras ng pagpunta ng mga pulis para isilbi ang warrant.

PAGHAHANDA PARA MULING BUKSAN ANG TURISMO SA MINDANAO, KASADO NA

Tiniyak ni Tourism Sec. Christina Frasco sa mga mambabatas na kasado na ang kanilang paghahanda para muling buksan ang Mindanao sa turismo

Tugon ito ng kalihim sa interpellation ni Lanao del Norte Rep. Khalid Dimaporo sa budget briefing ng ahensya.

Ani Frasco, pinakamahalagang component ng pagbubukas ng turismo sa rehiyon ang tuloy-tuloy na peace and order.

Bunsod nito nakikipag-ugnayan na aniya sila sa dept of national defense upang maisugro na ang pagbubukas muli ng turismo sa rehiyon ay magiging ligtas at ma-maximize din ang potensyal ng mga LGU na makatulong sa turismo.

Nasa tatlompung porsyento naman ng kabuuang budget ng ahensyaa ng inilaan para sa Mindanao.

Kasabay nito hiniling naman ni Dimaporo sa DOT na matutukan din ang pagsasa-ayos ng mga tourism infrastratures na nasira dahil sa kalamidad.

Inihalimbawa ng kongresista ang lalawigan ng Lanao kung saan mula aniya nang tumama ang bagyong Vinta noong 2017 ay hindi pa rin naisa-ayos.

Ayon kay Frasco, bahagi ang tourism infrastructure rehabilitation nang kanilang Tier 2 proposal ngunit hindi naisama ng DBM sa 2023 NEP.

Bunsod nito inatasan na lamang aniya niya ang TIEZA na makipag ugnayan sa DOT upang makapag-paabot ang ahensya ng kahit maliit na tulong.

IMPRASTRAKTURANG ITATAG SA BANSA, MALAKING TULONG SA SEKTOR NG TURISMO

Bahagi ng pagpapabuti ng tourism experience ng bansa, ang pagtatatag ng ilang imprasktraktura na layong tulungan ang mga turista.

Sa budget briefing ng Dept ot Tourism, ibinahagi ni Tourism Sec. Christina Frasco ang plano nilang patatayo ng tourist assistance call center sa mga ports na magsisilbing one stop shop na maaring paghingan ng tulong at iba pang impormasyon ng mga turista.

Magtatayo rin ng sampung tourist rest areas sa Luzon, Visayas ay Mindanao na maaaring maging pahingahan ng mga turista, na may malinis na palikuran at apaslubogn center.

Ilulunsad din ani Fraso ang Bisita Be My (BBM) Guest Program kung saan bibigyan ng mga insentibo ang mga OFWs na mag-iimbita ng kanilang mga kaanak, kaibigan at iba pang turista na bumisita sa Pilipinas.

Tinukoy na rin aniya nila ang mga health facility na kailangan ayusin at i-upgrade para maserbisyuhan ang mga turista na mahaharap sa aksidente.

Kasama rin sa plano ng ahensya ang pagtatatag n g mga cultural at heritage areas sa buong bansa.

REFUND NG MGA NAKOLEKTA SA MOTORISTANG LUMABAG SA NCAP, HINILING SA KAMARA

Dapat ibalik ang mga multang nakolekta sa mga motoristang lumabag sa no contact apprehension policy o NCAP.

Ito ang iginiit ni Congressman Mikee Romero ng 1-Pacman Partylist matapos maglabas ng temporary restraining order ang korte suprema laban sa implementasyon ng NCAP.

Ayon kay Romero, malaki ang kinita ng mga local government unit at metro manila development authority  sa mga traffic violator gamit ang polisiya ng NCAP.

Pangunahing inirereklamo ng mga motorista ang nakalilitong polisiya at iba-ibang halaga ng multa na ipinapataw ng mga LGU.

Pinasalamatan naman ni Bonifacio Bosita ng 1Rider Partylist ang mabilis na aksiyon ng Korte Suprema at sa pagtugon sa mga reklamong idinulog ng mga motorista.

Dapat din anyang ayusin ang mga maling sistema na nagpapahirap sa mga motorista sakaling muling ipatupad ang NCAP.

₱3.57 BILYONG BADYET NG DEPARTMENT OF TOURISM, IPRENISENTA SA KOMITE

Sumalang na ngayong araw ng Dept of Tourism sa kanilang budget briefing.

Sa presentasyon ni Tourism Sec. Christina Frasco, ibinahagi nito na kabuuang P3.573 billion ang inaprubahang pondo ng DOT at attached agencies nito para sa susunod na taon mula sa original proposal na P12.2 billion.

Ayon sa kalihim ang pondong ito, ay gagamitin para palakasin pa ang industriya ng turismo upang maging isa sa major economic pillars of recovery mula sa pandemiya at maipakilala ang Filipino Brand salig na rin sa pahayag ng Pangulong Ferdinand Marcos Jr sa kanyang SONA.

P3.2Billion ng pondo ay para sa Office of the Secretary, P59.7 million ang para sa Intramuros Administration, P198.9 million para sa National Parks Development Committee at P9.5 million naman ang para sa Philippine Commission on Sports Scuba Diving.

Kabilang naman sa 7 point agenda ng DOT para mapagbuti ang industriya ng turismo ng Pilipinas ang improvement sa tourism infrastructure at accessibility, digitalization at connectivity, at pagpapalakas sa domestic tourism.

Ibinahagi rin ni Frasco n amula February 10, 2022 kung kailan binuksan muli sa foreign tourist ang leisure travel sa bansa, hanggang August 28, umabot na sa 1.352 million ang mga dayuhang turista ang bumisita sa bansa at inaasahang tataas pa ng hanggang 1.7 million sa pagtatapos ng taon.

Kapwa naman isinusulong nina Minority Leader Marcelino Libanan at Albay Rep. Edcel Lagman na maitaas ang pondo ng DOT lalo na para sa mga infrastructure development.

SANGAY NG HEART CENTER OF THE PHIL. SA VISAYAS, ITATATAG SA LILOAN CITY

Inihain ni Cebu Rep. Vincent Franco “Duke” Frasco ang House Bill 3879 na layong magtayo ng Heart Center of the Philippines – Visayas.

Sa gitna na rin ito ng tumataas na bilang ng mga taga Visayas na nagkakasakit sa puso.

Tinukoy ni Frasco na nakasaad sa ating konstitusyon ang mandato ng estado na makapagbigay ng episyente at epektibong health care system para sa lahat ng Pilipino.

Dagdag pa nito na sa mismong SONA ng Pangulong Ferdinand Marcos Jr. ay binanggit nito na hindi lamang dapat nasa NCR ang mga specialty hospitals tulad ng Heart Center.

Batay sa House Bill 3879, ipapatayo ang Philippine Heart Center – Visayas sa Liloan Cebu.

Nakapaloob din dito ang panuntunan sa pagbuo ng Board of Trustees na mayroong 7 miyembro na siyang mamamalakad sa PHC-Visayas.

Kukunin naman ang pondo nito sa taunang appropriations ng Dept of Health kung saan ipapaloob ang subsidy program para sa capital outlay ng ospital.

TRO SA PAGPAPATUPAD NG NCAP, UMANI NG PAPURI AT SUPORTA SA MGA MAMBABATAS

Ilan pang mambabatas ang nagpahahyag ng suporta sa ibinabang temporary restraining order ng Korte Suprema hinggl sa pagpapatupad ng No Contact Apprehension o NCAP.

Sa mensahe ni 1 Rider PL Rep. Bonifacio Bosita, sa Radyo Pilipinas, sinabi nito na good news ang TRO para sa mga motorista.

Aniya, sa pamamagitan nito, ang ilan sa mga maling sistema na lalong nagpapahirap sa mga motorista ay mabibigyan muna ng kaukulang atensyon at solusyon bago tuluyang ipatupad ang NCAP.

Pinasalamatan din nito ang Supreme Court s amabilis na pagtugon sa problemang idinulog ng mga motorista sa kanila.

“Good news para sa mga kapatid nating motorista itong inilabas ng Supreme Court na TRO para sa mga Local Government Units na nagpapatupad ng NCAP. Good news dahil may ilang mga maling sistema na lalong nagpapahirap sa mga motorista na mabibigyan muna ng kaukulang atensyon at solusyon bago tuluyang ipatupad itong NCAP. Congratulations sa motorists group at iba pa na nasa likod ng lumabas na TRO; and Maraming salamat sa Supreme Court dahil mabilis nilang tinugunan ang problema ng mga motorista na idinulog sa kanila.”

Pinuri din ni Albay Rep. Joey Salceda ang hakbang ng Korte Suprema.

Ani Salceda, dahil sa TRO ay mapo-protektahan ang mga motorista na hindi na ma-agrabyado pa ng polisiya hanggang sa ma-resolba ang legalidad nito.

Dapat naman aniyang gamitin ng transport agencies, pati na ng DILG ang TRO upang bumuo ng mas malinaw na panuntunan para sa NCAP.

“I respectfully urge Secretaries [Benhur] Abalos and [Jaime] Bautista to take this halting of the NCAP as an opportunity to guide LGUs on enforcing traffic rules so that their methods do not encroach upon basic rights. I think now is the time to study a framework, and to really consult with all stakeholders, especially transport workers who have no choice but to be on the road every day – despite the risk of getting fined.” Paliwanag ni Salceda.

KOALISYON NG MGA MAMBABATAS NA NAGSUSULONG NG MALIKHAING INDUSTRIYA, IPINAKILALA NI REP. DE VENECIA

Muling isinulong ni House Special Committee on Creative Industry and Performing Arts Chairperson Rep. Christopher De Venecia (4th District, Pangasinan) ang malikhaing industriya ng bansa, sa privilege hour ngayong Martes ay hiniling niya ang suporta mula sa kanyang mga kapwa mambabatas, na tumulong na sukdulang maiangat ang mga malikhain. 

Binanggit ni De Venecia na ang Arts, Culture at Creative Industries Bloc (ACCIB) ay sinimulan sa ika-18 Kongreso. 

Ipinaliwanag niya na ang ACCIB ay isang impormal at walang kinikilingang koalisiyon ng mga mambabatas, na ang pangunahing layunin ay tugunan ang kakulangan ng kinakailangang suportang institusyonal, na sagabal sa tagumpay ng malikhaing industriya. 

Bilang mga mambabatas, layon ng mga miyembro ng ACCIB na: 1) maghain ng mga panukala at resolusyon na magsusulong ng mga kapakanan ng mga malikhain; 2) maglobi ng suporta para sa pondo para sa mga ahensya ng pamahalaan na nagpapatupad ng mga programa, para sa mga industriya ng kultura at malikhain; 3) gampanan ang kapangyarihang oversight upang matiyak na ang mga batas ay wastong naipapatupad at ganap na tumutugon sa mga nagsusulong; 4) magsulong at mag-udyok ng kolaborasyon sa mga ahensya ng pamahalaan at pribadong sektor; at 5) pangunahan ang pagpapakalat ng mga impormasyon sa mga nagsusulong upang magkaroon ng kamalayan sa mga umiiral na suportang institusyonal at proteksyon, kabilang na ang publiko sa mga aktibidad ng ACCIB. 

Dahil dito, ipinagdiwang ni De Venecia ang pagsasabatas ng Republic Act 11904, o ang Philippine Creative Industries Development (PCID) Act, na nagsulong at nagpapaunlad ng mahigit na 50 malikhaing industriya sa Pilipinas. 

Bukod sa pag-iimbita sa iba pang mga mambabatas na sumapi sa ACCIB, hinimok niya rin pati na ang mga nasasakupan na pag-aralan ang batas sa PCID, upang ang mga malikhain sa kanilang mga distrito ay makinabang sa mga programa, serbisyo, at mga insentibo na nakasaad sa batas. 

“With the help and cooperation of all its members, the possibilities of what the bloc can contribute to cultivating the creative industries are truly limitless. I humbly ask everyone to spread the word about RA 11904 to your respective creative communities. I firmly believe with all my heart that #TheFutureIsCreative,” aniya.

POGOs, LUMISAN NA SA BANSA DAHIL SA TAAS NG BUWIS NA KANILANG BINABAYAD

Kinumpirma ng PAGCOR na kalahati sa mga Philippine offshore gaming operators (POGOs) ang lumisan na sa bansa dahil sa mataas na buwis na kanilang ibinabayad sa gobyerno na batay sa Republic Act No. 11590.

Ito ang inihayag ni PAGCOR Chair Alejandro Tengco sa sinagawang pagdinig ng House of Representatives’ committee on appropriations hinggil sa Pagcor’s revenues.

Inamin ni Tengco ng tumaas ang buwis na ipinataw ng gobyerno sa POGO hindi na tumaas ang kanilang kita.

Ayon kay Tengco, mula sa 60 licensed operators, sa ngayon mayruong na lamang 30 ang nasa bansa kung saan 27 dito ang nananatiling active habang ang tatlo ay hindi na operational.

Inihayag naman ni Juanito Sanosa Jr, PAGCOR President and Chief Operating Officer na ang dahilan sa paglisan ng mga legitimate POGO company sa bansa ay dahil sa mataas na gaming tax.

Batay sa report, ang mga umalis na POGO company sa Pilipinas ay lumipat sa bansang Cambodia at Dubai.

Makikipag ugnayan din ang PAGCOR sa NBI at PNP hinggil sa pagtugis sa mga illegal operators ng POGO.

MGA NAISAGAWA, NAISAKATUPARAN NG PCSO, INIULAT SA KOMITE NG APPROPRIATIONS

Ipinagpatuloy ngayong Martes ng Komite ng Appropriations sa Kapulungan ng mga Kinatawan, na pinamumunuan ni AKO BICOL Rep. Elizaldy Co ang mga pagpupulong sa panukalang P5.268-trilyon pambansang badyet para sa taong 2023. 

Inimbitahan sa pagpupulong ang Philippine Charity Sweepstakes Office (PCSO), ang punong ahensya ng pamahalaan na naatasang lumikom at maglaan ng pondo para sa mga programang pangkalusugan, tulong at serbisyong medikal, at mga kawanggawa na may pambansang katangian. 

Nilinaw ni Committee Senior Vice Chairperson Marikina City Rep. Stella Luz Quimbo sa mga mambabatas, na hindi humihingi ng pag-apruba ng kanilang badyet ang PCSO, bagkus ay naimbitahan sila upang pormal na mag-ulat sa kanilang naisakatuparan, mga naisagawa at naibigay sa pamahalaan. 

Sa kanyang ulat, ibinahagi ni PCSO Chairman Junie Cua na ang mga napagbentahang tiket mula sa umiiral na mga laro sa loterya, ay ibinabahagi sa pamamagitan ng pagbabawas ng dalawang porsyentong halaga ng pag-imprenta mula sa halaga ng kabuuang mga resibo, upang makamit ang netong halaga ng mga resibo. Ito ay hahatiin sa tatlong pondo, katulad ng: ang net prize fund na binubuo ng 55 porsyento; ang charity fund na binubuo ng 30 porsiyento; at ang net operating fund na 15 porsiyento. 

Sinabi ni Cua na para sa taong 2023, ang kanilang tinatayang benta ng mga tiket ay P55.78 bilyon nitong Agosto 25, 2022. Ito ay sasailalim muna sa pagsusuri ng lupon ng PCSO, at pagsasaalang-alang ng iba pang mga programang maaaring tutukuyin ng Tanggapan ng Pangulo at/o mga tukoy ng ahensya na sinuri at inaprubahan ng Governance Commission para sa Government-owned or Controlled Corporations (GOCCs). 

Ipinakita ni Cua ang plano para sa paggamit ng tinatayang P16.3 bilyong charity fund para sa 2023 nitong Agosto 25, 2022, na sasailalim sa pagsusuri at pag-apruba ng lupon: P2.36 bilyon para sa itinakdang kontribusyon/mga espesyal na batas/mga executive order; P11.15 bilyon para sa 20 porsiyentong documentary stamp tax; PP1.39 bilyon para sa programang medikal; P499.7 milyon para sa pagpapaupa ng kagamitan; at P982.7 milyong bahagi sa STL charity fund (LGUs, atbp.). 

Tinalakay din ni Cua ang mga hamon sa 20 porsiyentong documentary stamp tax (DST). 

Kinakatawan ng DST ang pinakamalaking bahagi ng gastos sa charity fund, at nililimitahan nito ang kapasidad na mapanatili ang probisyon ng pondo para sa iba pang mga prayoridad na programang pangkalusugan ng pamahalaan. 

Umapela siya at humingi ng suporta mula sa mga kasapi ng Komite, ukol sa 20 porsiyentong pagbawas sa ilalim ng panukalang Comprehensive Tax Reform Package 4 na kasalukuyang nakabinbin sa Komite ng Ways and Means. 

Sinabi ni Cua na tinitiyak ng 20 porsiyentong pagbawas ang patuloy na pagpopondo para sa mga programang pangkawanggawa, pagbibigay ng karagdagang pondo para sa pangkalahatang pangangalagang pangkalusugan, at garantiyang suporta para sa tulong ng PCSO para sa iba pang mga programang prayoridad sa kalusugan ng pambansang pamahalaan sa kapakinabangan ng lahat ng Pilipino. Bilang tugon sa tanong ni Committee Vice Chairman at Quezon Rep. David Suarez hinggil sa iba pang larong digital ng PCSO, ipinahayag ni Cua na nais nilang mag-online dahil ito ay mangangahulugan ng higit na kaginhawahan para sa mga mananaya. 

“We are hoping this shift to digitalization would improve revenues,” ani Cua.

PAGPUPULONG HINGGIL SA MGA PLANO AT PROGRAMA NG PAGCOR PARA SA TAONG 2023, TINAPOS NA NG KOMITE NG APPROPRIATIONS

Tinapos na ngayong Martes ng Komite ng Appropriations sa Kapulungan ng mga Kinatawan, na pinamumunuan ni AKO BICOL Rep. Elizaldy Co ang pagpupulong sa mga pangunahing plano at programa ng Philippine Amusement and Gaming Corporation (PAGCOR) para sa taong 2023, gayundin ang pinakamagandang bahagi ng kanilang operasyon at usaping pinansiyal.  

Sa nasabing pagpupulong, binati ni Co ang PAGCOR sa pagpapanatili ng reputasyon nito bilang isa sa mga nangungunang tagapagtaguyod sa mga GOCC. 

“Your remittances will surely aid the delivery of critical government services to our kababayans both here and abroad," ani Co. 

Sinabi naman ni Senior Vice Chair at Marikina City Rep. Stella Luz Quimbo ng Komite ng Appropriations, na bagaman hindi tumatanggap ng suporta sa badyet ang PAGCOR mula sa pamahalaan, ang pagpupulong ay isinagawa dahil sa tungkulin ng ahensyang magbigay ng pondo sa iba't ibang programa ng pamahalaan. 

Ayon kay Quimbo, ang ahensya ay may mandato na pamahalaan ang industriya ng pasugalan, magbigay ng pondo sa mga programang sosyo-sibiko at pagpapaunlad ng pamahalaan, gayundin ang tumulong sa pagsulong ng industriya ng turismo. 

Ang pagpupulong ay bahagi ng pagsusuri sa P5.268-trilyong panukalang pambansang badyet para sa piskal na taong 2023. 

Ang mga opisyal ng PAGCOR na dumalo sa pagdinig ay pinangunahan ng bagong Chairman at Chief Executive Officer ng ahensya na si Alejandro Tengco. 

Para sa 2023, umaasa ang PAGCOR na makalikom ng tinatayang pondong P55.898 bilyon, habang ang aktwal na kita nito noong 2021 sa kabila ng pandemyang dulot ng COVID-19 ay pumalo sa P35.5 bilyon. Tinatayang kikita ito ng P55 bilyon ngayong 2022. 

Ang kabuuang kontribusyon nito sa iba't ibang mga proyekto at programa sa pagbuo ng bansa noong 2021 ay umabot sa P22.9 bilyon, at inaasahang aabot sa P35.5 bilyon ngayong taon. Para sa 2023, inaasahan namang aabot ang mga kontribusyon nito ng mas mataas sa P37.65 bilyon. 

Para sa 2021, nagbigay ito ng P7.71 bilyon sa Universal Health Care Program batay sa RA 11223. Naglaan din ang PAGCOR ng P3.5 bilyon sa kasalukuyan, para sa pagtatayo ng Multi-Purpose Evacuation Centers sa 77 lugar sa buong bansa. 

Bukod sa pamamahagi ng emergency relief packs sa mga lugar na tinamaan ng kalamidad, nagbibigay din ang ahensya ng tulong pinansyal sa mga pamilya ng mga nasawi.

WALANG ISYU KAY VERGEIRE BILANG OIC, MAKAKATUGON PA RIN ANG DOH - GARIN

Ipinahayag nagyong Martes ni Deputy Majority Leader at Iloilo 1st District Rep. Janette Garin na walang negatibong epekto sa kakayanan ng ahensya, na tumugon sa mga kasalukuyan at nararanasang alalahanin sa kalusugan, ang papel ni Department of Health (DoH) Undersecretary Maria Rosario Vergeire's bilang officer-in-charge (OIC).

"Being an OIC in terms of pandemic response...will not in any way affect the delivery of health services," ito ang sinabi ni Garin sa mga mamamahayag sa Kapulungan sa ginanap na pulong balitaan ng Ugnayan sa Batasan Majority News Forum. 

Pinangalanan ni Pangulong Ferdinand "Bongbong" Marcos Jr. si Vergeire bilang DOH-OIC, habang wala pang naitatalagang Kalihim.

Bilang OIC ng Kagawaran ng Kalusugan, kailangang harapin ni Vergeire ang pananatili ng pandemyang dulot ng coronavirus disease-19 (COVID-19), kabilang na ang iba pang mga banta sa kalusugan tulad ng monkeypox. 

Nang matanong sa pulong balitaan kung ang kawalan ba ng Kalihim ng DoH ay naging dahilan upang ang ahensya ay hindi maayos na nakatutugon sa mga pampublikong kagipitan sa kalusugan, ay sumagot si Garin, na dati ring Kalihim ng DoH, nang hindi.

"Well, basically as a former secretary of health, I don't think there's really a huge impact kasi yung powers ng officer-in-charge, is the same powers as the acting [secretary], except on appointive powers," ani Garin. 

"And based on my understanding, 'yung Opisina ng Presidente eh binigyan naman ng leeway 'yung DoH officials to recommend additional powers as they deem necessary to be able to be effective in healthcare response," dagdag pa ng mambabatas. 

"Be that as it may, kung pinag-uusapan natin ang pandemya the less movements inside, the better," ani Garin, na tumutukoy sa DoH. 

"I think what is urgently needed now dahil nga meron ngang mga nag-retire, mayroon mga bagong direktor na kailangan is for all the appointments to come out para 'yung mga unfilled positions ay ma-fill upan na," dagdag pa ni Garin. #

MGA KONTRA SA BAKUNA, BINATIKOS NI GARIN SA PASYA NG CHED NA IPAHINTO ANG COVID-19 BAKUNA PARA SA MGA MAG-AARAL

Binatikos ngayong Martes ni Deputy Majority Leader at Iloilo 1st District Rep. Janette Garin ang mga kumokontra sa bakuna, at tinawag niya itong malakas na lobby group na parating nakakontra sa bakuna, sa kabila ng malinaw na polisiya ng pamahalaan sa usapin ng pandemyang dulot ng coronavirus disease-19 (COVID-19). 

"I think CHED's announcement is the success of anti-vaxxers. The anti-vaccine group is a very strong lobby group that are also well-organized. So palagi 'yan silang komokontra kasi 'yan ang kanilang paniniwala," ito ang binigkas ni Garin sa idinaos na pulong balitaan ng Ugnayan sa Batasan Majority News Forum ngayong araw. 

Ito ang reaksyon ni Garin sa pahayag ng Commission on Higher Education's (CHED) na hindi na nila gagawing rekisitos sa mga mag-aaral sa higher education institution (HEI), maging ang kanilang mga kawani na magpabakuna para sa COVID-19 bilang paghahanda sa pagbabalik ng face-to-face classes. 

"Kapag ikaw naman eh magpadala doon, syempre medyo matakot ka kasi you'll be threatened with cases, then nandudoon na ngayon 'yung nahahati 'yung iyong desire to protect our people versus protecting yourself," paliwanag niya, na tumutukoy sa mga kontra sa bakuna.

Si Garin ay dating Kalihim ng Kagawaran ng Kalusugan (DOH). Naniniwala siya na kailangan nang makialam ang Malacañang, at magpasya kung ano ang mabuti para sa mga mamamayan hinggil sa naturang usapin. 

"Ang pananaw ko, it's now the President’s call. Because only the President can make sure that when people in government do their job, they will be protected," aniya. 

"I believe it's a matter that should really be discussed thoroughly by government. Because when there's a fight between pro-vaccine and anti-vaccine, kailangan na kailangan na pumagitna ang gobyerno at tingnan kung ano ba ang nararapat para sa sambayanang Pilipino," giit ni Garin. 

Ayon sa mambabatas, ilalagay ng polisiya sa panganib ang mga nakakatandang Pilipino at HEIs na may usapin sa kalusugan. 

"I think the bigger risk there is for the professors and the employees of the state universities and even colleges and universities. Kasi medyo may comorbidities marami sa kanila above 35 years old, mayroon din dyan about 60 years old and halos karamihan dyan mayroon ng maintenance medication, which makes them prone to COVID complications," aniya.

UNANG PULONG NG KOMITE NG PUBLIC ORDER AT SAFETY, IDINAOS

Nagsagawa ng unang pagpupulong ngayong Martes ang Komite ng Public Order at Safety ng Kapulungan ng mga Kinatawan, na pinamumunuan ni Rep. Dan Fernandez (Lone District, Santa Rosa City), sabay din ng briefing ng mga law enforcement agencies hinggil sa kanilang mga plano at programa. Sa kanyang pambungad na pananalita, sinabi ni Fernandez ang pinakabuod ng una nilang pagpupulong sa organisasyon. 

“Prior to this, some members of the attached agencies of the DILG have been with us in drafting and crafting procedures that we are going to do in the next three years of our existence in Congress. The very essence of the committee, which has been established under the internal rules and procedures of the House of Representatives, is our jurisdiction over and above the direct and principal in relation to the suppression of criminality,” ani Fernandez. 

“Alam naman po natin that this involves the illegal drugs, illegal gambling, organized crimes, private armies, as well as the regulation of firearms and firecrackers, regulation of the PNP, BF and BJMP. 

We are hoping that together with all the Members who are here, we will be working so hard in crafting and drafting measures that will really alleviate the plight of our attached agencies under the DILG," dagdag pa niya. 

Kabilang sa unang walong prayoridad na batas na inaasahan ng PNP na maisasabatas ng Kongreso ang: 1) national police clearance system; 2) pagrerestraktura at pagpapalakas ng PNP; at 3) pagtatatag ng forensic DNA database sa bansa. 

Samantala, ang susunod na hanay ng mga hakbang na inaasahan ng PNP na magiging batas ay: 1) pag-amyenda sa Section 33 ng R.A. No.6975 (educational requirement for lateral entry program in the PNP); 2) pagsasailalim sa institusyon ng pinalakas na pulis pambarangay ng PNP; at 3) rehistrasyon ng subscriber identity module (SIM) card, at iba pa. Ito ay ayon kay PCol. Nicolas Salvador, Hepe ng Legislative Affairs Center. 

Pinuri ni Fernandez ang pagtatanghal ng PNP ng modelong M+K+K = K (malasakit + kaayusan + kapayapaan = kaunlaran), gayundin ang pakikilahok ng PNP sa mga barangay, na masugpo ang krimen. 

Sinabi ni PNP Chief Gen. Rodolfo Azurin na mahalagang bumuo ng mga relasyon sa mga pinuno ng barangay, gayundin sa mga pinuno ng simbahan upang mapigilan ang mga krimen sa mga komunidad. 

Binanggit din nina BFD Director Louie Puracan, BJMP Chief Allan Iral, NAPOLCOM Vice Chairperson at Executive Officer Atty. Alberto Bernardo ang mga prayoridad ng kani-kanilang ahensya sa ika-19 na Kongreso.

DALAWA PANG CHAIRPERSONS NG KOMITE, HINIRANG NG KAPULUNGAN

Dalawa pang chairman ng Komite sa Kapulungan ng mga Kinatawan, sa ilalim ng pamumuno ni Speaker Ferdinand Martin Romualdez ang hinirang ngayong Martes sa sesyon ng plenaryo. Nagmosyon si Senior Deputy Majority Leader Ferdinand Alexander Marcos upang ihalal si Rep. Michael Romero (Party-list, 1-PACMAN) na pamunuan ang Komite ng Poverty Alleviation. 

Ang Komite ay sumasaklaw at pangunahing may kaugnayan sa lahat ng usapin sa mga polisiya, at programa na tutugon sa kalagayan ng kahirapan sa bansa, at iba pang mga hakbang upang iangat sa kalagayan ng mga mahihirap, at isulong ang kanilang mga karapatan sa pantay na akses sa mga oportunidad, para sa maginhawang pamumuhay. Samantala, si Rep. Jose Aquino II (1st District, Agusan del Norte) ay nahirang bilang chairman ng Komite ng Public Information.  

Tutugunan ng Komite ang lahat ng usapin na direkta, at pangunahing may kaugnayan sa pampublikong impormasyon, at lahat ng uri ng pangkalahatang komunikasyon at media na ginagamit, kabilang na ang paglalathala at broadcast media, pelikula at telebisyon, video, advertising, cable television at internet content, at mga karapatan at responsibilidad ng mga tao at mga kompanya na may kaugnayan rito.

P18.9-B NA HINDI NAKA PROGRAMANG PONDO PARA SA MGA MANGGAGAWA SA KALUSUGAN, NILINAW NG MAMBABATAS

Sinabi ngayong Martes ni Deputy Majority Leader at Committee on Appropriations Vice-Chairperson Rep. Janette Garin (1st District, Iloilo) sa idinaos na pulong balitaan ng "Ugnayan sa Batasan" Majority News Forum, na gagamitin nila ang bawat minuto at bawat oras upang gampanan ang kanilang tungkulin bilang mga mambabatas, ngayong nagsimula na ang deliberasyon sa badyet. 

Ayon sa kanya, ang mga budget briefings ay hindi magiging sagabal sa mga regular na pagdinig ng mga Komite, kahit limitado lamang ang mga ginagamit na conference rooms. 

Nang matanong hinggil sa mga hindi naka programang pondo ng Kagawaran ng Kalusugan (DOH) na nagkakahalaga ng P18.9-bilyon, na nakalaan para sa mga benepisyo at allowances sa mga pampublikong kagipitan sa kalusugan ng mga healthcare at non-healthcare na manggagawa, ipinaliwanag ni Garin na hiwalay ito sa mga allowances na iginagawad sa sa mga manggagawa sa kalusugan, sa pamamagitan ng Republic Act 11712, o ng "Public Health Emergency Benefits and Allowances for Health Care Workers Act." "The P18.9-billion in the unprogrammed fund will not in any way affect the risk allowances, the full transpo allowances that our health workers are benefitting at the current moment," aniya. 

Idinagdag niya na ang mga nakasama sa mga naka programang pondo ay mga regular na sahod at allowances para sa mga manggagawa. 

"We are not hoping that there would be another public health emergency in 2023, but then if that happens, ang unprogrammed fund naman talaga ay pwedeng mapondohan," dagdag pa ni Garin. 

Ang panukalang badyet ng DOH para sa Fiscal Year 2023 ay  P296.3-bilyon. 

Tiniyak niya rin na ang kakulangan ng bagong Kalihim ng DOH ay walang magiging epekto sa paghahatid ng serbisyo-publiko sa kalusugan, at ang pagpili ng mga bagong kawani para sa mga bakanteng posisyon sa Kagawaran ay mas mahalaga.

MGA BENEPISYO NG MGA HEALTH WORKER, KAHIT NASA UNPROGRAMMED FUNDS ANG PARA SA EMERGENGY ALLOWANCE AY HINDI MAAAPEKTUHAN

Hindi maaapektuhan ang kasalukuyang benepisyo ng  mga healthcare workers kaugnay ng patuloy pa rin na banta ng pandemya.

Ito ang tiniyak ni House Deputy Majority leader Janet Garin kahit nasa unprogrammed funds ang 18.9-billion pesos para sa emergency allowance and benefits ng mga health workers para sa 2023.

Ayon kay Garin, vice chairperson ng House Committee on Appropriations, ang unfunded items ay resulta ng napagtibay na batas para matiyak na tuloy-tuloy ang benepisyo ng mga public at private health workers sakaling muling magkaroon ng mga public health emergencies bukod sa covid-19.

Sa ilalim anya ng batas, tungkulin ng gobyerno na magkaloob ng dagdag na health emergency allowances mula 3-thousand hanggang 9-thousand pesos depende sa “health risk” sa lugar ng kanilang trabaho.

Tiwala si Garin na mapopondohan pa rin ang mga unprogrammed items lalo na kapag lumagpas ang target revenue collection ng gobyerno.