EXECUTIVE ORDER SA PAGPAPATUPAD NG MORATUTIUM SA MGA LOAN PAYMENT NG MGA AGRARIAN REFORM BENEFICIARY LALAGDAAN NA NG PANGULO

Lalagdaan ni pangulong Ferdinand Marcos Jr ang executive order na magpapatupad ng moratorium sa mga loan payment ng mga agrarian reform beneficiaries.

 

Ito ang inihayag ni agrarian reform secretary Conrad Estrella III sa budget deliberation sa kamara.

 

Ayon kay estrella.. ang EO ay pipirmahan ng pangulo sa kanyang birthday sa September 13.

 

 Anya. May tiwala siya kay  pangulong marcos  dahil malaking tulong  ito sa mga beneficiaries  kung saan ang pambayad dapat ng utang ay maari nilang magamit na karagdagang capital.

 

Samantala.. nanawagan din ang DAR chief sa mga kongresista naipasa ang panukalang condonation ng land amortization fees ng mga agrarian reform beneficiaries.

 

Anya… nakausap na niya ang ilang miembro ng mataas at mababang kapulungan ng kongreso at naniniwala siyang susuportahan nila ang panukala.

BILANG PAKIKIISA NG KAPULUNGAN SA TANGGAPAN NG PANGULO, PAGDINIG SA P9.031-B PANUKALANG BADYET NG OP TINAPOS SA LOOB NG 10 MINUTO

Wala pang 10 minuto ay tinapos na ng Komite ng Appropriations sa Kapulungan ng mga Kinatawan, na pinamumunuan ni AKO BICOL Rep. Elizaldy Co ang pagdinig sa P9.031-bilyon panukalang badyet ng Tanggapan ng Pangulo (OP) para sa piskal na taong 2023, bilang paggalang sa kapantay na sangay ng pamahalaan. 

Bilang pagsuporta sa badyet ng OP, dumalo sa pagdinig sina Speaker Ferdinand Martin Romualdez, Majority Leader Manuel Jose “Mannix” Dalipe, at Senior Deputy Majority Leader Ferdinand Alexander Marcos, kasama ang ilang kasapi ng Komite. 

Sinabi ni Co sa kanyang pambungad na pahayag na buong pusong kinikilala ng Komite ang pangako ng OP, at sa wastong pagkilala sa mandato ng konstitusyon sa isang kapantay na sangay ng pamahalaan na pinatunayan ng pagdalo ng mga pangunahing opisyal nito, sa pangunguna ni Executive Secretary Vic Rodriguez sa pagdinig ng badyet. 

Binigyang-diin ni Co na ang 1987 Constitution ang nagbigay sa Pangulo ng mga kapangyarihang ehekutibo at inatasan siyang tiyakin na ang mga batas na ipapasa sa Kongreso, kabilang ang General Appropriations Act, ay matapat na maisakatuparan. 

“Ang Pangulo din po ang magtitimon sa mga departamento at ahensiya ng pamahalaan, upang maabot ang walong point na socio-economic agenda lalo na ang paglikha ng trabaho at pagsupo sa kahirapan,” aniya. 

Pagkatapos ay kaagad namang nagmosyon si Dalipe upang wakasan ang pagdinig sa badyet ng OP, at tinukoy ang kinikilalang tradisyon ng pagpapalawig ng parlyamentaryong kortesiya sa isang kapantay na sangay ng pamahalaan, na mabilis namang sinegundahan. 

Nagpasalamat si Rodriguez sa mga mambabatas sa pangunguna ni Speaker Romualdez sa pagsuporta sa panukalang badyet ng OP. 

“And in line with the expressed instruction of His Excellency President Ferdinand Romualdez Marcos Jr., you can be assured that the Office of the President is here, together with you your Honors, in meeting the expectations and hopes of the more than 112 million Filipinos, which the President now leads, founded on a solid foundation of 31.5 million votes more or less, in promoting the people’s welfare and upholding the interest of the nation. We are one with you your Honors in nation-building. Maraming salamat po,” ani Rodriguez.  

Samantala, nagpahayag si Minority Leader Marcelino Liban ng pagsuporta ng Minority sa mosyon na wakasan ang paunang pagdinig ng badyet ng OP bilang kortesiya. 

Panghuli, sinabi ni KABATAAN Rep. Raoul Danniel Manuel na ihahain na lang nila sa plenaryo ang kanilang mga alalahanin tungkol sa confidential at intelligence funds, gayundin sa pondo para sa Oversight National Security Programs sa ilalim ng panukalang badyet ng OP. 

Ang panukalang badyet ng OP ay P796.2 milyon na mas mataas kaysa sa 2022 na badyet nito na P8.235-bilyon.

PANUKALANG BADYET NG OPS PARA SA 2023, TINAPOS NA SA KOMITE NG APPROPRIATIONS

Tinapos na ng Komite ng Appropriations sa Kapulungan ng mga Kinatawan, na pinamumunuan ni Rep. Elizaldy Co (Party-list Ako Bicol) ngayong Biyernes ang briefing sa panukalang badyet ng Office of the Press Secretary (OPS) para sa 2023. 

Sa kanyang pambungad na mensahe, inilarawan ni Committee Senior Vice Chair at Marikina City Rep. Stella Luz Quimbo ang Office of the Press Secretary (OPS) na may pangunahing mandato na magbalangkas, at magpatupad ng mga sistema sa impormasyon para sa Tanggapan ng Pangulo, at magmantine ng ugnayan sa mga media at tagasulong. 

Sinabi ni Quimbo na ang OPS ang nagbo-broadcast ng mga mahahalagang aktibidad ng ehekutibo, na nakakaapekto sa araw-araw na buhay ng sambayanan, partikular na ang pagtugon sa mga natural na kalamidad. 

“By doing so, OPS helps assure the people that the government is addressing their most pressing needs, na merong gobyernong kumakalinga sa kanila lalo na sa panahon ng taghirap”, ani Quimbo, na isponsor ng badyet ng ahensya. 

Idinagdag niya na kinakailangan lamang para sa Kongreso na repasuhin ang mga programa ng ahensya at mga aktibidad, at tiyakin ang sapat na mapagkukunan upang sila (OPS) ay epektibong makapamahagi ng mga mahahalagang impormasyon sa 100 milyong Pilipino sa buong kapuluan. 

Sa kanyang presentasyon, sinabi ni Press Secretary Trixie Cruz Angeles na sa 2023 National Expenditure Program (NEP), ang kabuuang halaga ng badyet ng OPS Proper ay P473.1-milyon. 

Sa halagang ito, P192.5-milyon ang ilalaan sa personnel services (PS) samantalang P275.5-milyon ang mapupunta sa maintenance and other operating expenses (MOOE). 

Samantala, P5- milyon ang ilalaan sa capital outlay (CO). 

Gayundin, sa ilalim ng 2023 NEP, ang halagang P748.3-milyon ay ilalaan sa mga kalakip na ahensya at mga korporasyon ng mga pag-aari ng estado tulad ng Intercontinental Broadcasting Corporation (IBC) at APO Production Unit na makakuha ng zero badyet. 

Lahat ng mga kalapkip na ahensya at korporasyon ay makakakuha ng zero badyet para sa kanilang capital outlay. 

Bilang tugon sa tanong ni Rep. Edcel Lagman (1st Distrct, Albay) hinggil sa kung ang ahensya ba ay may kongkretong polisiya, at istratehiya upang sugpuin ang misinformation at disinformation sa social media, sinagot ni Angeles na sila ay lumikha ng fact-checking team at mga tumutugon sa mga usapin hinggil sa mga tungkulin at kapangyarihan ng pamahalaan, at iba pa.

KAPASIDAD NA MAKABILI NG SARILING PRINTING PRESS ANG NPO, INILAPIT NG OPS SA KAMARA

Pagbibigay kapasidad sa National Printing Office para pambili ng sariling printing press, inilapit ng OPS sa mga mambababtas.

--

Hiniling ng Office of the Press Secretary sa Kongreso na magkaroon ng panukala para pahintulutan ang National Printing Office na mabigyan ito ng retaining capacity upang makabili ng sariling printing press.

Ito’y matapos mapuna sa budget briefing ng ahensya ang kawalan ng capital outlay funding ng NPO.

Ayon kay Press Secretary Trixie Cruz-Angeles, nakakalungkot na mayroong NPO ang pamahalaan ngunit walang naman sariling printing press.

Dahil dito naga-outsource ang NPO para sa pagi-imprenta ng mga government forms na aniya’y posibleng maging banta rin sa ating national security.

Bunsod nito umapela si Angeles sa mga mambabatas na gumawa ng lehislasyon na para payagan na magkaroon ng retention ang NPO para sa kanilang CO.

“Ang maaari po kasi naming, ang pino-propose naming bilang legislation sa darating na kongreso ay mabigyan ng retaining capacity. Kasi nagre-remit kami P100 million per year. Kung makakaporsyento kami, or meron ia-allow kami ng retention for capital outlay makakabili po kami ng mga printing presses para sa NPO.” saad ng kalihim.

Dagdag pa ni Sec. Angeles ang pagiimprenta ng NPO ay hindi na lang lilimitahan sa printing ng government forms bakgus ay palalawigin pati sa paglilimbag ng libro.

Sa paraan aniyang ito, mas mae-engganyo ang publiko na magbasa at magahanap impormasyon mula sa iba pang resources upang malalabanan naman ang fake news.

“Ang ambisyon nga naming hindi na lang government forms, pagka nakabili kami ng iba’tibang klaseng press aabot na rin tayo sa puntong maka-encourage tayo ng pagbabasa. Kasi isang panglaban sa mga fake news ay ma-capacitate natin ang atinng mga mamamayan marunong magbasa, marunong, nag-e-encourage ng mga nagsusulat ng libro, mae-encourage yung mga second round printings na wala nang copyright, yung process of decoding kasi sa pagbabasa nakakatalino. Pangalawa kung marunong magbasa at marunong magbasa ng maige ang ating citizenry, yung issue ng fake news medyo nadio-diminish, magkakaroon ng kapasidad na maghanap ng impormasyon fro mother resources ang ating mga mamamayan. Kaya ang hihingin naming in terms of legislation ay baka pwede naman kaming ma-capacitate na bumili ng press namin.” Diin ng Kalihim.

PAGTALAKAY SA 2023 BADYET NG DAR, TINAPOS NA NG MGA MAMBABATAS

Kagyat na tinapos ng Komite ng Appropriations na pinamumunuan ni Rep. Elizaldy Co (Party-list, AKO BICOL) ngayong Biyernes ang pagtalakay sa panukalang 2023 badyet ng Department of Agrarian Reform (DAR). 

Si Rep. Teodorico Haresco Jr. (2nd District, Aklan) ang pangunahing isponsor ng badyet ng DAR. Tinalakay ni Committee Senior Vice Chairperson Rep. Stella Luz Quimbo (2nd District, Marikina City) ang mahalagang mandato ng DAR, at binanggit na, “when farmers have land, they can become more productive.” 

Idinagdag ni Quimbo na ito ay makakapamahagi sa layunin ng bansa para makamit ang seguridad sa pagkain, mapababa ng presyo ng mga pangunahing bilihin, at magkaroon ng maayos na ekonomiya. 

Sa kanyang presentasyon, inilatag ni DAR Secretary Conrado Estrella III ang mga plano at kasalukuyang interbensyon ng DAR, upang suportahan ang Agrarian Reform Beneficiaries (ARB). 

Kabilang dito ang moratorium para sa pagbabayad ng amortization fees, at interes ng mga utang ng ARB, kondonasyon ng pagbabayad para sa land amortization fees, at suporta para sa proyekto ng Parcelization of Lands for Individual Titling (SPLIT). 

Iniulat din ni Estrella na ang DAR ay nakipag-partner sa Department of Public Works and Highways (DPWH) para sa konstruksyon ng mga farm-to-market roads, kasama na ang Technical Education and Skills Development Authority (TESDA) upang magsagawa ng mga pagsasanay para sa ARBs, na naglalayong makakuha ng diversified sources ng kita. 

Samantala, sinabi ni DAR Assistant Secretary for Finance Aurita Ang na bagamat ang orihinal na panukala ng DAR ay P26.47-bilyon, ang inaprubahang pondo sa 2023 National Expenditure Programs ay P15.85-bilyon lamang. 

Matapos ang mabusising presentasyon na ginawa ng DAR, ay kagyat na tinapos ng lupon ang talakayan na walang isa man sa mga miyembro ang nag-interpellate. Nangako si Estrella na siya ay makikipag-ugnayan sa mga mambabatas sa anumang mga parokyal na usapin matapos ang briefing.

PAGSUSURI SA P23.041-B PANUKALANG BADYET NG DENR, TINAPOS NA NG KOMITE NG APPROPRIATIONS

Tinapos ngayong Biyernes ng Komite ng Appropriations ng Kapulungan ng mga Kinatawan, na pinamumunuan ni Rep. Elizaldy Co (Partylist, AKO BICOL) ang pagsusuri sa panukalang badyet ng Department of Environment and Natural Resources (DENR). P23.041-bilyon ang panukalang badyet ng DENR para sa Fiscal Year 2023. 

Sinabi ni Co na inaasahan nilang ang mga programa at proyekto sa climate adaptation ng DENR para sa 2023 ay nakabatay sa agham, at isasama ng ahensya ang mga polisiya sa kalikasan, at mga programa sa pagpapaunlad na sumusuporta sa pangmatagalan, napapanatili, at inklusibong paglago ng ekonomiya. 

Samantala, sinabi ni Senior Vice-Chairperson at Marikina City Rep. Stella Luz Quimbo labis na napakahalaga ng hangarin ang pagbangon ng ekonomiya na hindi madaling mapapawi ng mga natural na kalamidad at mga sakuna. 

Sinabi ni DENR Secretary Ma. Antonia Yulo-Loyzaga na ang Kagawaran ay magsusumikap para sa nexus-based na pamamahala sa kapaligiran, at mamumuhunan sa mga siyentipikong sistema, gayundin ang isang diskarte na nakabatay sa panganib sa pinagsamang pamamahala sa kapaligiran, at napapanatiling paggamit ng likas na yaman. 

Binalangkas din niya ang kanilang mga prayoridad sa badyet para sa 2023, na kinabibilangan ng: 1) pagmamapa at pagtutuos para sa mga likas na yaman ng bansa gamit ang geospatial intelligence, economics, at natural, social, at industrial science; 2) pagtulong sa pagpapaunlad ng matatag na mga lungsod at munisipalidad; 3) seguridad sa tubig, pagkain, at enerhiya; at 4) proteksyon ng mga katutubong uri bilang bahagi ng likas na pamana ng bansa. 

Hinimok ni BH Partylist Rep. Bernadette Herrera ang DENR na i-maximize ang kanilang mga pondo at awtomatikong alokasyon mula sa mga nakalaan na kita upang maiwasan ang mga hindi nailabas at hindi obligadong paglalaan. 

Binigyang-diin ni DENR Undersecretary Analiza Rebuelta-Teh ang pangangailangan ng ahensya na pahusayin ang pagbili, trabaho, at sistema sa pinansyal na pagpaplano nito. Gayundin, nangako si Loyzaga na susuriin ang kanilang mga proseso, upang epektibong magamit ang kanilang badyet. 

Ang pagdinig ay itinaguyod din ni Appropriations Committee Vice-Chairperson at Palawan Rep. Jose Alvarez.

ADVERTISEMENT NG MGA GOVERNMENT AGENCY, DAPAT IPALABAS SA MGA GOVERNMENT MEDIA

Itinutulak ni Baguio Rep. Mark Go na himukin ang iba’t ibang government agencies na imbes na sa pribadong media network ay sa government media magpalabas ng kani-kanilang advertisement.

Ito ang nakikitang solusyon ng mambabatas upang mapataas ang revenue o kita ng state media at mapondohan naman ang kinakailangang personnel services at mooe nito.

Sa budget briefing ng Office of the Press Secretary, nabanggit ni Press Secretary Trixie Cruz-Angeles na ang kita ng PTV mula sa pumapasok na advertisements ay inilalaan para pambayad ng kanilang mga empleyado.

Bunsod nito, suportado ng kalihim ang suhestyon ng kongresista.

Aniya bahagi ng kanilang policy making powers ay maaari nilang imandato sa mga ahensya ng pamahalaan na unang mag-advertise sa PTV at IBC

Umapela rin si Sec. Angeles na maisama ang Philippine News Agency o PNA na siyang news wire ng pamahalaan upang mapalakas at ma-pick up ng foreign news agencies ang ating mga balita.

Pagtitiyak naman ni Go na babalangkas siya ng panukala upang maisakatuparan ito. 

SITWASYON NG IBC 13,INILAPIT NG OPS SA MGA MAMBABATAS

Inilapit ni Press Secretary Trixie Cruz-Angeles sa mga mambabatas nag sitwasyon ng IBC 13.

Sa pag-depensa ng Office of the Press Secretary sa kanilang P1.22 Billion 2023 proposed budget, nabanggit ng kalihim na wala nang ponding inilaan para sa IBC.

Mula sa orihinal nilang proposal na P123 million para sa personnel services, P80 million para sa MOOE at P215 million o kabuuang P418.7 million ay walang pondo na inaprubahan sa 2023 NEP.

Apela ni Sec. Angeles, kung hindi mapopondohan ang IBC ay mawawalan ng trabaho ang mga empleyado nito ay pagsapit ng Enero ay posibleng closed operations na ang network.

Paliwanag ng kalihim, kaya nabigyan ng zero budget ang IBC ay dahil sa ang categorization nito ay for privatization.

Ngunit aniya para ma-privatize ang media network kailangan nitong maka generate ng hindi bababa sa P1 billion na ilalaan sa modernisasyon ng PTV.

Pero diin nito, na kung walang pondo ang IBC ay hindi nito magagawang kumite o tumaas ang value nito.

PANUKALANG BADYET NG DENR PARA SA TAONG 3023 UMAABOT SA ₱23.041 BILYON

Umaabot sa 23.041 billion pesos ang proposed budget ng department of environment and natural resource.

Nabawasan ito ng P2.4 billion mula sa 2022 general approproations act .

Ang   annual average budget ng kagawaran ay nasa 23.7 billion pesos.

Bagaman nabawasan ang budget   para sa susunod na taon.. ito ay paghahatihatian ng denr at anim na attached agencies.

Samantala..

Sinabi ni environment secretary Antonia Yulo-Loyzaga  layon ng kagawaran na mag invest sa  scientific system and risk based approach para sa  environment integrated management at  natural resources sustainable utilization.

Anya ang mga plano at programa ng DENR ay critical para sa pagkamit ng 8-pt agenda ni Pangulong Ferdinand Marcos Jr.  at serbisyo sa  bayan.

Nangako ito sa mga mambabatas na kukunsultahin ang lahat ng stakeholders at  at iaayon ang mga programa at proyekto ng kanyang ahensya sa mga current, emerging and practical technologies.

TUMAGAL NG PITONG MINUTO LAMANG ANG DELIBERASYON SA BUDGET 2023 NG OP

Tumagal lang ng pitong minuto ang budget briefing ng Office of the President.

Kasunod ng pag-mosyon ni majority leader mannix dalipe na i-terminate ang budget briefing bilang kortesiya sa ehekutibo na co-equal branch.

Kabuuang P9.031 billion pesos ang panukalang budget ng OP para sa susunod na taon.

Malaking bahagi ng budget ng tanggapan ng pangulo ay para sa Maintenance and other operating expenses o MOOE na nagkakahalaga ng P6.87B.

P1.56B naman ang inilaan para sa Personal Services hababng P590 million ang para sa Capital Outlay.

Tumaas ang personnel services dahil sa increase sa premium contribution sa Philhealth, pagpapatupad ng Salary Standardization Law at pagpuno sa mga bakanteng planitlla position.

Nagkaroon din ng increase sa MOOE dahil para sa travel expenses dahil sa unti-unting pagbubukas ng travel restrictions.

Sa panig naman ng OP, ipinaabot ni Executive Sec. Vic Rodriguez ang pasasalamat sa suprota ng mga mambabatas.

Asahan aniya na kaisa sila sa pagtataguyod ng kapakanan ng mga Pilipino at nation building.

“And in line with the expressed instruction of his excellency president Ferdinand Romualdez marcos jr. you can be assure that the office of the president is here together with you, your honors in meeting the expectations and the hopes of the more than 112 million filipinos which the president now leads founded on a solid foundation of 31.5 million votes more or less in promoting the people’s welfare and upholding the interest of the nation. We are one with you in nation building, maraming salamat po.” Saad ni ES Rodriguez.

MABILIS NA PAG-APRUBA NG BUDGET 2023 NG OP, INALMAHAN

Walang pang limang minuto…approved na ng house committee on appropriations ang 8.9-billion pesos na panukalang budget ng office of the president para sa 2023.

Present si executive secretary vic rodriguez sa hearing na siyang kumatawan sa office of the president.

Nag-manifest si house majority leader manuel dalipe na ang mabilis na pag-apruba  ay tradisyon bilang co-equal branch of government.

Pero nagbanta naman ang house minority group sa pangunguna ni kabataan partylist representative raoul manuel na bubusisiin ang budget ng office of the president pagdating sa plenaryo.

DAGDAG PONDO PARA SA RICE COMPETITIVENESS ENHANCEMENT PROGRAM FUND NG PAMAHALAAN, IMINUNGKAHI

Ipinapanukala ni Nueva Ecija Rep. Mikaela Suansing na madagdagan ang earmarked na pondo para sa Rice Competitiveness Enhancement Fund o RCEF.

Sa ilalim ng House Bill 212 ng mambabatas, aamyendahan ang Section 13 ng RA 11203 o Rice Tariffication Law.

Kung saan, mula sa kasalukuyang P10 billion na pondong inilalaan sa RCEF ay itataas ito sa P15B 

Bukod dito, pinadaragdagan din ang earmarked na pondo para sa iba pang essential farm inputs tulad ng fertilizer.

Mula naman sa P5 billion na funding itinutulak na itaas sa P5.5 billion ang pondo para naman sa mechanization program sa ilalim ng PHILMEC.

Nai-refer na sa House Committee on Agriculture ang naturang panukala. 

PANGUNGUMPISKA NG LISENSIYA NG MGA LUMABAG SA BATAS TRAPIKO NG MGA LGU, IDINILOG SA KAMARA

Idinulog ni 1-Rider PL Rep. Bonifacio Bosita sa DILG ang  pangungumpiska ng mga LGU sa lisensya ng mga motoristang lumabag sa batas trapiko.

Tinukoy ni Bosita nabatay sa Land Transportation and Traffic Code of the Philippines (RA 4136) partikular ang section 3.4 ang mga LGU ay maaaring magbigay ng traffic violation ticket pero ang LTO at deputized agent lamang nito ang maaaring mangumpiska ng lisensya.

Punto ni Bosita, malinaw sa naturang batas na hindi dapat nangungumpiska ang mga LGU ng lisensya dahil sa traffic violation.

Tugon naman ni DILG Secretary Benhur Abalos valid ang punto ni Bosita at makikipag-ugnayan na umano ang kanyang tanggapan sa LTO upang makagawa ng hakbang kaugnay nito.

Babalangkas din aniya ang ahensya ng rekomendasyon sa Kongreso upang makabuo ng panukalang batas kung kinakailangan para masolusyunan ito.

HINDI PAGSUSUOT NG FACE MASK SA CEBU CITY BATAY SA EO NG MAYOR SA SIYUDAD, IKINAGULAT NG DILG SECRETARY

Ikinagulat ni DILG Sec. Benhur Abalos ang pahayag ni Cebu City Mayor Michael Rama, na tuloy ang pagpapatupad sa ibinaba nitong Executive Order kung saan non-obligatory na ang pagsusuot ng face mask sa outdoor areas sa siyudad.

Sa ambush interview ng media kay Abalos sinabi nito na nagulat siya sa bagong pahayag ng alkalde dahil nakausap lamang niya ito noong Miyerkules para pakiusapan na huwag muna ipatupad ang EO at hintayin muna ang desisyon ng IATF tungkol dito.

Positibo naman aniya ng tugon ni Rama at sinabi na bukas na i-defer o ipagpaliban muna ang implimentasyon ng naturang EO.

Nangako naman si Abalos sa Cebu City Mayor na ilalapit sa IATF ang kanyang EO at sakaling pag-bigyan ay itutulak pa nga aniya niya na gawing pilot area ang Cebu City.

Diin ng kalihim, mahalaga na mapag-isa muna ang national at local laws upang iisa lamang aniya ang susunding kumpas ng pamahalaan kaugnay sa naturang usapin.

Susubukan aniya niya ulit kausapin si Rama upang linawin ito.

“Medyo nagulat ako sa sinabi mo dahil nag-usap lang kami kahapon ang sabi niya sa akin he is willing to defer (the implementation of the EO). Ang importante dito iisang sagwang lang tayo, iisang direksyon.” Ani Abalos.

Introduction to Multilevel Marketing Scams and Quota systems

Mga Katropa, pamilyar ba kayo sa mga kalakaran ng isang Multi Level Marketing na modus?

 

Ganito kasi ang pagpapatakbo noon, may isang produkto na sasabihin na ibenta mo para bigyan ka ng mas malaking kita at magkakaroon ka ng mas malaking reward o premyo o incentive.

 

Ang mangyayari niyan mga Katropa, magkakaroon ka ng quota para maabot mo yung kinakailangan na benta kaya mapipilitan ka kumuha ng downline paminsan. Mapipilitan ka magbenta sa mga produktong napakataaas ng halaga o mapipilitan ka kumuha ng mga downline mo kaya minsan mapapautang ka o uutang kasa upline mo.

 

Kung pamiliyar sa inyo ang ganitong raket sa mga investment scams, ito ay dahil naghuhugis pyramid ang itsura ng ganitong scam. Mas malaki ang kita ng nasa taas kung ikukumpara sa mga downline.

 

Ano ba ang pinagkaiba nito sa mga totoong kompanya na may sales at manufacturing? Dahil nga wala silang empleyado at dahil itong kompanya at sumasalalay sa mga downline nito para makabenta, tataasan ang mga insentibo o kita ng mga nasa downline.

 

Mapanganib ang ganitong modus dahil kapag umayaw ang downline o kapag nag cash out na ang nasa gitna ng isang nasa pyramid, gigiba ang istraktura ng kompanya at masisira ang daloy ng pera.

 

Masakit para sa mga sumasali dito lalo na ang mga nabibitin at mga nagpasok na ng kanilang mga pinaghirapan na pera. Ang tawag pa dito ng mga eksperto sa negosyo ay Kamada. Matapos sipsipin ang pondo, kahit sino pwede na iwan ang scam na ito dahil nakuha na ang mga insentibo.

 

Ilan beses na din nagpalabas ng advisory ang Securities Exchange Commission laban sa mga pyramiding scheme. Tulad ng isang herbal na kumpanya di umano noong 2020 kung saan sari-saring komisyon at bonus ang pinapangako para sa kanilang mga nire recruit hanggang sa umabot na di na kakayanin ang finances ng kumpanya at naiwan sa kangkungan ang mga tao lalo na nung mga downline.

 

Ngayon naman mga Katropa, mas may nakaka-alaramang sitwasyon dito pagdating sa medical industry natin. Baka naging biktima na kayo kaya ikwe kwento ko ang ginagawa ng isang pharma company na hindi muna natin papangalanan.

 

Ganito daw ang style ng pharma na ito, ipapa enganyo ang mga doktor para sumama sa isang aktibidad para ipaliwanag ang kanilang “marketing” para makabenta. Ang ituturo daw, kapag mas maraming mabenta na produkto, mas malaki ang rebate o balik sa kanila ng gagastusin para sa prescription at mas malaking kita sa mga doktor.

 

Parang may sistema o tracking sa pamamagitan ng automation ng mga prescription ng mga doktor.

 

Talamak daw ito sa mga cardiologist at mga senior consultant at hindi lang sa mga batang doktor. May isang inumin ang kanilang tinetesting ngayon para sa ganitong modus.

 

Ang gagawin paramihan ng prescription para maabot ang quota ng mga doktor na ito mga ka tropa. Isipin mo kapag doktor ka, nanumpa ka na ibibigay mo ang lahat para gumaling ang inyong pasyente.

 

Pero dahil sa scam na ito, doble doble ang preskripsyon para lang maabot ang quota. Sa madaling salita, kahit hindi kailangan ng isang pasyente ang produkto, ipipilit ito ng para makuha ng mga doktor ang pera at mga insentibo.

 

Baka nakakalimutan din ng kompanya at mga doktor na nagiging bahagi ng Multi Level Marketing sa prescription ay iligal at bawal ang mga ganitong modus at bukod pa dito, linalagay ninyo sa panganib ang buhay ng inyong mga pasyente!

Ang Chain Distribution ay iligal sa batas at habang maaga pa magandang matalakay ito para aware ang ating mga pulis at sundalo at iba pang law enforcers na nakikinig sa ating programa.

 

Babasahin ko lang ang sinasabi ng DTI tungkol dito sa mga modus.

 

“Article 53 of Republic Act 7394 or the Consumer Act of the Philippines clearly provides that Chain Distribution Plans or Pyramid Sales Schemes, such as deriving profits primarily or mainly from recruitment of participating members and not from the marketing and sales of products and services shall not be employed in the sale of consumer products.”

 

Dahil may produkto kayo at doble doble ang prescription na inyong binibigay sa mga pasyente na di naman kailangan, linoloko niyo ang mga tao at malala pa dito, pinipilit niyo pa bilhin ito sa pamamagitan ng panloloko. Aba eh mas malala pa kayo sa Pharmally!

 

Ito ang tatalakayin natin sa susunod na linggo mga Katropa! Abangan! 

PAGTATAYO NG MGA KADIWA CENTER SA LAHAT NG LUNGSOD AT MUNISIPALIDAD, IMINUNGKAHI SA KAMARA

Panahon na para magtayo ng Kadiwa Agri-food Terminals sa bawat lungsod at munisipalidad sa buong bansa.

Ayon kay Congressman Wilbert Lee ng AGRI Partylist, sa ilalim ng House Bill 3957, layunin nito na mabigyan ng venue at pagkakataon ang ating mga magsasaka na maibenta ang kanilang mga produkto sa abot-kayang halaga.

Sabi ni Lee, sa harap ng patuloy na pagtaas ng presyo ng pagkain at iba pang bilihin, malaking tulong ang Kadiwa Centers na mailapit sa mga komunidad.

Anya, may mapagbebentahan agad ng produkto ang mga magsasaka at mangingisda nang hindi na kailangang bumiyahe pa ng malayo habang ang mamimili ay may madaling access sa mas mura at masustansiyang pagkain.

Sa bill, katuwang ang mga local government unit sa pangangasiwa ng mga Agri-food terminals gaya ng direct retail selling pati na  Kadiwa on wheels para matiyak na mas mababa ng 10 to 20 percent ang presyo ng bilihin kumpara sa mga palengke.

Paliwanag ni Lee, kapag naisabatas, 25-billion pesos ang ilalaan kada taon sa implementasyon ng programa at 10-billion pesos ang ilalaan sa Department of Agriculture para mapalawak ang programa.

PANUKALANG 2023 BADYET NG DOE AT ERC, SINURI NG MGA MAMBABATAS

Sinuri ngayong Huwebes ng Komite ng Appropriations na pinamumunuan ni Rep. Elizaldy Co (Party-list, AKO BICOL) ang panukalang 2023 badyet ng Department of Energy (DOE) at Energy Regulatory Commission (ERC), sa pagdinig na ginawa sa Kapulungan ng mga Kinatawan. 

Ang panukalang badyet ng DOE sa 2023 na iprinisinta ni OIC Director Michael Sinocruz ng DOE ay P2.22-bilyon. 

Mula sa halagang ito, humigit-kumulang P1.12-bilyon ang ilalaan para sa maintenance and other operating expenses (MOOE), habang P735-milyon naman ang mapupunta sa personnel services (PS). Samantala, humigit-kumulang P358-milyon ang ilalaan para sa capital outlay (CO). Ang 2023 budget ay mas mataas ng 1.5 percent kumpara sa P2.19-bilyon na nakalaan ngayong taon. 

Samantala, sinabi ni ERC Chairman Monalisa Dimalanta na ang panukalang budget ng ERC para sa 2023 ay P1.03-bilyon. Sa halagang ito, P347-milyon ang ilalaan sa personnel services (PS); P611.9-milyon sa maintenance and other operating expenses (MOOE); at P78.4-milyon para sa capital outlay (CO). 

Tinalakay din niya ang kanilang mga pangunahing target para sa 2023. Kabilang dito ang pagpapatibay ng isang balangkas sa regulasyon para sa mga bagong teknolohiya, upang suportahan ang seguridad ng enerhiya; pagsuporta sa paghahanap para sa seguridad ng enerhiya; at pinakamababang gastos sa pagpepresyo tungo sa pagiging abot-kaya, at iba pa. 

Pinangunahan ni Appropriations Senior Vice Chair at Marikina City Rep. Stella Luz Quimbo, Vice Chair at Camarines Sur Rep. Arnie Fuentebella at Vice Chair at AKO BICOL Party-list Rep. Raul Angelo Bongalon ang pagdinig.

PAGDINIG SA PANUKALANG BADYET NG DILG PARA SA 2023, TINAPOS NA NG KOMITE NG APPROPRIATIONS

Tinapos na ngayong Huwebes ng Komite ng Appropriations sa Kapulungan ng mga Kinatawan, na pinamumunuan ni AKO BICOL Rep. Elizaldy Co ang pagdinig sa P251.18-bilyon na panukalang badyet ng Department of the Interior and Local Government (DILG) para sa Piskal na Taon 2023, na kung saan ay dinepensahan ito ni Nueva Vizcaya Rep. Luisa Lloren. 

Sa kanyang pambungad na pahayag, kinilala ni Co ang mahalagang papel ng mga lokal na pamahalaan sa pagbangon ng bansa mula sa sosyo-ekonomikong epekto na dulot ng pandemya. 

Bukod sa pagpapalakas ng kakayahan ng mga LGU na mahusay na makapaglingkod sa mamamayang Pilipino, idinagdag ni Co na dapat ding pagtuunan ng DILG ang pagpapalakas ng laban nito kontra sa paghihimagsik, kriminalidad, at mga ilegal na droga. 

Inihayag ni DILG Secretary Benjamin Abalos Jr. ang mga prayoridad ng DILG na binubuo ng: 1) pagpapakita ng pinakamataas na potensyal ng mabuting lokal na pamamahala; 2) pagpapayaman sa mga relasyon ng pambansa at lokal na pamahalaan; 3) pagbabago sa mga proseso at sistema ng pamamahala sa pamamagitan ng teknolohiya; at 4) pagpapahusay ng mga kakayahan ng DILG at mga sangay na ahensya nito. 

Samantala, binanggit ni DILG Undersecretary Marlo Iringan na ang kanilang panukalang badyet ay maglalaan ng P217.369-bilyon para sa Personnel Services, P31.156-bilyon para sa Maintenance at Other Operating Expenses, at P2.658-bilyon para sa Capital Outlay. 

Binigyang-diin naman ni Deputy Speaker Raymond Democrito Mendoza ang kahalagahan ng paggalang sa karapatang pantao, at tinanong ang Philippine National Police (PNP) tungkol sa pagsisikap nitong suportahan ito. 

Tiniyak ni PNP Chief General Rodolfo Azurin Jr., na dumalo sa obligadong seminar ang puwersa ng kapulisan, upang matiyak na mapangangalagaan din nila ang karapatang pantao sa pagganap ng kanilang mga tungkulin. 

Sa kanyang bahagi, nagtanong si Senior Deputy Minority Leader Paul Ruiz Daza hinggil sa mga inisyatiba ng DILG na isulong ang kaluwagan ng pagnenegosyo sa mga LGU. Iniulat naman ni Iringan na ipinapatupad ng DILG ang mga interbensyon sa pagpapaunlad ng kapasidad, kabilang ang pagpapanaig ng mga sistema at proseso ng mga LGU, upang labanan ang red tape. 

Nangako siya na magsusumite ang ahensya ng ulat sa Kongreso tungkol sa pagsunod ng mga kinauukulang tanggapan ng pamahalaan.

PANUKALA NA MAGPAPALAWIG SA CORPORATE LIFE NG PADC, APRUBADO SA KOMITE

Inaprubahan ngayong Huwebes ng Komite ng Government Enterprises and Privatization sa Kapulungan ng mga Kinatawan, na pinamumunuan ni Rep. Edwin Olivarez (1st District, Parañaque City) ang House Bill 3622, na naglalayong paliwigin ang corporate life ng Philippine Aerospace Development Corporation (PADC) ng 50 taon pa. Ang panukala ay muling inihain nina Deputy Speaker Kristine Singson-Meehan at Rep. Lord Allan Velasco (Lone District, Marinduque City), at ito ay naaprubahan na sa ikatlo at huling pagbasa noong ika-18 Kongreso. 

Binanggit ni PADC President and CEO Raymond Mitra na ang corporate life ng PADC ay nakatakdang matapos ang bisa sa ika-5 ng Setyembre 2023, alinsunod sa Presidential Decree 286. 

Sinabi niya rin na ang pagpasa sa panukala ay lubhang napakahalaga, upang makamit ang mga mahahalagang layunin ng Philippine Development Plan 2017-2022, paigtingin ang pambansang pagkakaisa sa mga industriya ng aviation at aerospace, tugunan ang lumalagong banta sa panglabas sa pamamagitan ng pagtitiwala sa sarili sa mga kagamitang pang depensa, kabilang na ang pagsusulong ng paglilipat ng teknolohiya mula sa mga kapit-bansa. 

Samantala, nag briefing si Governance Commission for GOCCs (GCG) Chairman Alex Quiroz sa Komite, hinggil sa kanilang mga mandato at mga umiiral na programa. 

Inilatag rin niya ang mga prayoridad na adyenda sa lehislasyon ng GCG, na kinabibilangan ng pagpapalawig at paglilinaw ng mga kapangyarihan ng GCG, maayos na pag-uuri ng Government Owned and Controlled Corporations (GOCCs), pag-aayos ng termino ng tanggapan ng GCG Chairman at mga Commissioners, paggagawad ng kapangyarihan sa oversight sa mga pag-aari ng GOCC, at paggagawad ng kapangyarihan sa pag-iimbestiga at pagdidisiplina, at iba pa. 

Sa idinaos na pulong, inaprubahan din ni Olivarez ang rules at procedures ng Komite. Sinabi niya na natanggap na ng Komite ang 78 House bills at dalawang House Resolutions na isinumite sa kanila.